25 dagar í 80 kg ;)
Annars þá var ég að lesa mér aðeins til á netinu um maltitol og önnur sykuralkóhól. Þau virðast ekki vera alveg eins saklaus og framleiðendur kolvetnissnauðra vara vilja meina. Þeir telja margir hverjir kolvetni frá sykuralkóhólum ekkert með, þ.e. að þau eigi bara öll að draga frá heildarkolvetnamagni í vörunni. Aðrir vilja meina að það eigi að reikna með 0,5 g kolvetni fyrir hvert gramm af sykuralkóhóli og svo eru þeir sem eru á þeirri skoðun að þessi kolvetni eigi öll að reiknast með.
Málið er að sykuralkóhól eru auðvitað kolvetni, en þau frásogast yfirleitt mun hægar en önnur kolvetni, eða bara mjög lítið, og hafa þannig óveruleg áhrif á blóðsykurinn. En það er einmitt þetta sem virðist vera einstaklingsbundið. Sumir geta étið og étið eins og þeir vilja af vörum með sykuralkóhólum og það hefur engin áhrif á þyngdartapið, á meðan aðrir finna fyrir því að þessar vörur virkilega hafa áhrif og þurfa því einnig að passa magn sykuralkóhóla. Einhversstaðar las ég að hjá þeim sem þola það að borða sykuralkóhólvörur án þess að það hafi áhrif á þyngdartapið, finni þá frekar fyrir gasmyndun í meltingarvegi og jafnvel niðurgangi. En það er vegna þess að þá fara sykuralkóhólin að mestu ómelt í gegn og hafa þessu áhrif á meltingarkerfið. Ég virðist sem betur fer vera ein af þeim sem þolir að borða sykuralkóhól, allavegana hef ég ekki fundið að það skemmi fyrir þyngdartapinu, og eins þá er nú stundum ansi mikið loft í mér ef ég borða töluvert af þessu, eins og grey kallinn fær að finna fyrir núna eftir hlaupátið mitt, hahaha :Þ
En ég verð nú að segja að ég er í svo góðu skapi þessa dagana, frábært að vera komin á skrið eftir langa stöðnun. Mér gengur bara mjög vel dag eftir dag :D Fór í rætina áðan og er nýbúin að borða rosa góðan mat og líður alveg frábærlega :D Svona var matseðill dagsins:
Morgunmatur: Egg og beikon.
Hádegismatur: Smá svínastrimlarestir og léttsteikt grænmeti frá í gær, 1 sneið Lindbergbrauð með L&L, osti og spægipylsu.
Orkubiti: Ca 30 grömm kolvetnasnautt súkkulaði og 30 grömm kolvetnasnautt hlaup frá Lenu sætu :D
Kvöldmatur: Grillkjöt, bæði nauta og svínakjöt, ásamt majoneshrásalati.
Þetta var svo hrikalega góður kvöldmatur, yndislega meyrt og gott kjöt sem gjörsamlega bráðnaði uppi í manni. En vá hvað það eru margar hitaeiningar í svona majoneshrásalati, en ég bara leyfði mér það samt. Dagurinn var því pínu kaloríuríkur, eða um 1670 kkal., en kolvetnamagnið var ágætt, þ.e. ca 27 grömm kolvetni. Nú hef ég alltaf reiknað svona 5% af kolvetnunum frá sykuralkóhólum með og ég ætla bara að halda þeirri reikningsaðferð áfram, hefur allavegana virkað fyrir mig.