Hæhó!

Það er alldeilis sukkið á manni núna, heh! Bara étið allt sem maður á ekki að éta. Hlakka til að komast til Íslands þegar það verður ekki eins mikið flakk og ráp á manni. Nú er það bara skyndibitamatur og svo það sem gestgjafarnir bjóða upp á. Vona nú að öll 5,4 kg sem ég losnaði við undanfarnar fimm vikur komi ekki alveg strax aftur :Þ Við erum sko búin að keyra niður alla Svíþjóð, yfir til DK og þar fyrst til Slagelse, svo til Köben í Tívolí og síðan aftur til Slagelse. Svo keyrðum við til Kalundborg í gær og tókum ferjuna yfir til Aarhus, keyrðum svo þaðan til Horsens til vinafólks okkar. Í dag skruppum við til Randers í frábæran dýragarð, Randers regnskov, við nenntum ekki í Legoland því það var bara rigning og leiðinlegt veður. Enda var þetta líka alveg frábær ferð. Svo var það smá stopp í Aarhus þar sem farið var í IKEA (gestgjafarnir voru að versla, ekki við) og svo aftur til Horsens þar sem ég sit núna og blogga og fæ mér bjór ;) Á morgum liggur leiðin aftur til Slagelse þar sem við gistum eina nótt og brunum svo til Kastrup eldsnemma á föstudagsmorgun og fljúgum heim til Íslands :D Skrifa bara meira þegar ég er komin á Frónið, svo bless í bili ;)

Hey já, ég keypti mér föt hér í Horsens, tvennar buxur, einn bol og eina hneppta peysu, svaka flott ;)

JIIIIIBBBÍÍÍÍÍÍÍ!!!!!!!!!!

80, 0 kg, náði markmiðinu :D Er ekkert smá ógeðslega ánægð. Var sko orðin svartsýn á að þetta tækist, en það hafðist :D

Nennti ekki að mæla ummálið, er að drífa mig af stað í ferðalagið. Kíki nú eitthvað í tölvu í fríinu. Hafið það gott stelpur, ég ætla að hafa það frábært :D

Hvað segir vigtin á morgun?

Nenni ekki að skrifa hvað ég hef borðað í dag, hef bara staðið mig ágætlega nema freistaðist aðeins í krembollurnar núna í kvöld. Er sko á fullu að pakka niður fyrir ferðalagið á morgun og hef engan tíma eiginlega :S En hlakka samt til að sjá hvað vigtin segir á morgun. Vona að hún verði góð við mig.

Annars er blogger eitthvað leiðinlegur núna. Er búin að reyna að pósta þessa færslu mörgum sinnum, en hún kemur aldrei á bloggið mitt. Vonandi tekst það fljótlega :/

2 dagar í ? kg :Þ

Já, hvað skyldi nú vigtin segja á sunnudaginn. Allavegana er ég búin að standa mig vel í dag. Fór meira að segja í ræktina og alles ;) Það verður síðasta skiptið í a.m.k. 4 vikur. Ég er að sjá það á íbúðinni núna að hún er að verða í lagi bráðum, ekki mikið eftir. Búin að ganga frá öllu barnadótinu og búin að henda helling af gömlum blöðum og öðru rusli. Það bíður mín smá þvottur til að brjóta saman, en ekkert í líkingu við það sem var.

En svona var matseðillinn í dag:

Morgunmatur: Egg og beikon.
Hádegismatur: Smá nautakjötsstrimlar.
Millibiti: Nokkrar kolvetnasnauðar kexkökur.
Kvöldmatur: Nautakjötsstrimlar með léttsteiktu grænmeti og smá rjómasoðsósu.
Kvöldnart: 50 grömm jarðhnetur.

Ég er reyndar ekki búin að fá mér jarðhneturnar, en er búin að plana að ég megi fá mér þær á eftir. Heildin í dag gerir um 1270 kkal. og 33 grömm kolvetni.

En jæja stelpur (og strákar ef einhverjir eru). Hvað haldiði að vigtin segi við mig á sunnudaginn? Er einhver til í að giska? Hehe :Þ

Dagurinn í gær

Ég gaf mér víst ekkert tíma til að skrifa í gær. Var að vinna til 15 og sótti svo ungana á leikskólann. Bjöggi þurfti að skreppa til Oslo að vesenast eitthvað í bílnum, vinur hans þekkir einhverja bílakalla þar sem aðstoðuðu hann. Eins gott að hafa bílinn í lagi þegar maður leggur af stað í langferð ;) En allavegana var ég bara voða þreytt í gær eftir vinnutörnina. Annars kallaði aðstoðardeildarstjórinn mig inn til sín í gær og var svo yndisleg að bjóða mér að vinna laugardaginn, þ.e. dagvakt, í staðin fyrir aðra næturvaktina mína og geyma bara hina þar til seinna. Þannig að ég slepp við næturvaktir um helgina :D Er voða ánægð því þá verð ég ekki grútsyfjuð þegar við leggjum af stað á sunnudaginn, og hef auk þess aðeins meiri tíma að undirbúa.

En já, matarlega séð var dagurinn í gær mjög fínn:

Morgunmatur: Egg og beikon.
Hádegismatur: Heimalöguð grænmetissúpa.
Miðdegisverður: Nautastrimlar með brokkolígratín og smá rjómasoðsósu.
Nart: 1 kolvetnasnauð kexkaka.
Kvöldsnarl: Cultura með jarðarberjum og smá strásætu.

Heildin gerði um 1180 kkal. og 30 grömm kolvetni. Er ánægð með það. Svo er ég að hugsa um að fara í leikfimi í dag, fór ekki í gær. En núna ætla ég bara að fara að malla mér egg og beikon í morgunmat :D

Ég hlakka svo til :D

Ég er orðin svoooo spennt að fara í fríið. Líka bara að hitta vinafólk okkar í Horsens í DK. Þau nefninlega byrjuðu á kolvetnasnauðu fæði um svipað leyti og ég, voru bæði (þetta er sko par) svolítið þétt, og hafa náð svakalega góðum árangri. Ég hef bara séð þau á myndum eftir að þau grenntust og þau mig, svo það verður líka gaman að sjást með berum augum og sjá árangurinn svona live :D Svo bara er ég farin að hlakka svoooo til að setjast niður með góðum vinum, fá mér bjór og syngja og spila. Hann Tíddi vinur minn er nefninlega svakalega góður að spila á gítar ;)

Annars finn ég að ég er orðin svolítið leið á þessu stranga átaki mínu, mig vantar fríhelgi þar sem ég get leyft mér hitt og þetta. Ég er ekki eins og Gerrit sem getur verið í algjöru fráhaldi dag eftir dag. En ég ætla nú að þrauka fram á sunnudag. Þá ætla ég að fá mér krembollu :Þ Hahahahaha!!!

Annars þá er fólk í vinnunni farið að taka eftir að ég er að grennast, þ.e. er farið að taka eftir því aftur (stóð náttúrulega svo lengi í stað eftir jólin), svo ég er greinilega að gera eitthvað rétt ;) Nýju gallabuxurnar sem ég keypti fyrir alls ekki svo löngu og voru svolítið þröngar í mittið eru ekki vitund þröngar lengur. Íþróttabuxurnar mínar, sem ég keypti fyrir kannski svona 2-3 mánuðum eru bara orðnar allt of víðar, eru sem betur fer með streng sem ég get hert að í mittið. Blússa sem ég keypti á útsölu í fyrrasumar og var þá of þröng smellpassar núna og er ógó flott. Ég fíla mig bara ferlega granna þegar ég er í henni og gallabuxunum mínum :D

Svo hlakka ég svo til að sjá hvað fólkið heima segir, hvort það sjái ekki að ég hafi grennst meira. Ég var síðast á Íslandi í maí í fyrra og þá hafði ég lést úr 117 kg í 95 kg og auðvitað sáu allir svakalegan mun. En ég er að átta mig á að ég er hreinlega búin að missa 13-14 kg síðan þá, svo fólk ætti eiginlega að sjá líka mun núna :D Ég hljóma örugglega frekar yfirborðskennd að hlakka svona til að einhver sjái mun á mér og hrósi mér, en það er bara svo mikils virði. Sjálfsálitið hefur bara farið beina leið upp á við á meðan vigtin hefur farið niður á við.

Þið þarna dönskupíur, vitið hvort það sé hægt að fá einhver flott en ódýr föt á Strikinu í Köben? Hef ekki komið þangað síðan ég var 15 ára.

Góður dagur í dag :D

Það voru sko engar helvítis krembollur á boðstólnum þennan daginn sko, hahaha. Er bara búin að standa mig með einstakri prýði ;) Var að vinna dagvakt í dag og borðaði því morgunmatinn mjög snemma. Svo fór ég í leikfimi eftir vinnu og púlaði vel. Mér líður líka mjög vel núna :D

Svona var dagurinn:

Morgunmatur: Egg og beikon.
Morgunkaffi: 1 soðið egg.
Hádegismatur: Salat með skinku- og ostbitum, smá dressing.
Orkubiti: 50 grömm fersk jarðarber.
Kvöldmatur: Steiktir nautastrimlar og léttsteikt grænmeti með smá rjómasoðsósu.

Heildin gerir um 1015 kkal. og 20 grömm kolvetni. Kannski ég fái mér smá jarðarber með rjóma á eftir, sé til bara ;) Hef allavegana alveg efni á því núna :D

5 dagar í 80 kg... eða eikkað :Þ

Jæja, ég var á kvöldvakt í dag. Þetta er búinn að vera mjög góður dagur matarlega séð, fyrir utan eina krembollu sem ég freistaðist til að fá mér. Kerlunum í vinnunni nefninlega datt í hug að hafa bláberjapaí og ís... hvað er að þeim sko? Hehe! Ég fékk mér þó allavegana ekki bláberjapaí og ís, úff. En ég fór í spítalasjoppuna og ætlaði að kaupa mér kolvetnasnautt súkkulaði í staðin til að gæða mér á á meðan hinar fengu sér bláberjapaí og ís. Nema, aldrei þessu vant var það ekki til. Þá ætlaði ég að fá mér jarðhnetur í staðið... og það var bara ekki heldur til!!! Glatað! Nú, svo þá freistaðist ég til að kaupa mér eina krembollu, buhu. Jæja, ég slapp samt ágætlega með þetta. Svona varð sem sagt dagurinn:
 
Morgunmatur: Egg og beikon.
Hádegismatur: Heimalöguð grænmetissúpa.
Miðdegisverður: 2 pylsur með salati og smá dressingu. Krembolla í eftirrétt.
Kvöldsnarl: Skinka og ostur bræddur saman í örbylgjuofni.
Miðnætursnarl: Heimalöguð grænmetissúpa.
 
Ég var nefninlega glorsoltin þegar ég kom heim af kvöldvaktinni núna áðan. Oh, vildi samt að ég hefði sleppt þessari krembollu, en það er of seint að gera neitt í því núna :Þ Heildin gerði um 1295 kkal. og 44 grömm kolvetni. Aðeins of mikið af kolvetnum þarna. Samt líður mér eins og það muni ekki skemma mikið núna. Vona bara að sú tilfinning sé rétt hjá mér :S

*Pirr*

Stend bara algjörlega í stað núna *pirr*

6 dagar í 80 kg ;)

Jæja, er bara ánægð með daginn í dag. Er búin að vera að sortera dótið hjá krökkunum og er reyndar ekki enn búin. Ég þarf nú bara að taka eitthvað af þessum hlutum og geyma í kassa. En annars er ég bara jákvæð og bjartsýn. Ætla ekkert að svekkja mig þó ég nái ekki sléttum 80 kg á sunnudaginn, ég er samt búin að ná fínum árangri. Er bara farin að hlakka óskaplega mikið til að komast í sumarfrí. Ætla að passa mig vel að detta ekki gjörsamlega í óhollustuna, en ég ætla samt að leyfa mér ýmislegt sem ég hef haldið mér frá undanfarið.
 
Í dag var maturinn á þessa leið:
 
Morgunmatur: Egg og beikon.
Hádegismatur: Brokkolígratín með rækjum.
Millibiti: 30 grömm kolvetnasnautt súkkulaði. Ein pylsa ca klukkutíma seinna :Þ
Kvöldverður: Heimalöguð grænmetissúpa.
 
Þessi pylsa átti nú ekkert að fara ofan í mig *hóst*. Ég var að gefa krökkunum að borða og hún bara sveif upp í mig alveg óvart, án þess að ég tæki eftir því. En hún svo sem var ekkert að skemma mikið, hefði verið verra ef þetta hefði verið brauðsneið eða kökusneið, sælgæti eða eitthvað slíkt ;) En þessi grænmetissúpa sem ég eldaði mér. Namminamminamm! Þvílíkt sælgæti. Það var bara unun að borða hana, hahaha. Allavegana fannst mér hún alveg svakalega góð, hitaeiningasnauð og alls ekkert mikið af kolvetnum í henni; ca 7 grömm í skammtinum. Ég er með uppskriftina af henni hér. En sem sagt, þessi dagur gerði ca 1240 kkal. og 20 grömm kolvetni. Er mjög ánægð með það :D Já og svo fór ég líka í ræktina og gekk vel ;)

Og enn er drasl :S

Ekki náði ég að taka til eins og ég ætlaði *andvarp*, en það er þó á réttri leið. Nú er stofan full af dóti úr barnaherberginu. Ég bara skúbbaði öllu dótinu á einn stað. Það var sko út um alla íbúð og herbergið þeirra... OMG! Nú þarf ég bara ("bara") að sortera þetta og skipuleggja smá, þá verður þetta svaka fínt ;)
 
Annars er dagurinn bara búinn að vera alveg ágætur matarlega. Kallinn leyfði mér að sofa til hádegis svo ég borðaði ekki morgunmat. Borðaði miðdegisverð snemma svo ég var orðin ansi svöng núna áðan. Það var spurning um að fá sér eitthvað óhollt snarl, eða bara eitthvað saðsamt og almennilegt, svo ég ákvað að velja það síðarnefnda.
 
Hádegismatur: Egg og beikon.
Tiltektarsnarl: 1 lítil krembolla.
Miðdegisverður: Brokkolígratín með rækjum.
Eftirréttur: 30 grömm kolvetnasnautt súkkulaði.
Kvöldkaffi: 2 Fiber+ hrökkbrauðssneiðar með L&L, kjúklingaáleggi, salami og osti.
 
Heildartölurnar eru um 1395 kkal. og 35 grömm kolvetni. Þetta er nú bara mjög fínn sunnudagur hjá mér, undanfarnar vikur hef ég nefninlega alltaf verið pínulítið extra góð við mig á sunnudögunum, hehe.

Ein vika í 80 kg - vigtun og mæling í dag

Sem sagt vigtun og mæling í dag. Ætlaði að vera orðin 81 kíló slétt, en vigtin var ekki alveg sammála mér og sýndi 81,3. Verð að viðurkenna að ég er pínulítið svekkt, en þetta er nú samt ekkert langt frá. Sentimetrarnir standa flestir í stað, sést samt smá munur á mittinu og mjöðmunum.
 
Brjóst:............102 cm (102)
Mitti:...............76 cm (77)
Magi...............99 cm (99)
Mjaðmir:..........98 cm (99)
Upphandleggur:.32 cm (32)
Læri:................61 cm (61)
Kálfi:................39 cm (39)
 
Nú hef ég bara viku til að komast í 80 kg. Það þýðir að ég þarf að missa 1,3 kg næstu viku :S Ég geri mitt besta ;) Fór ekkert í leikfimi í síðustu viku nema þennan eina dag sem ég var alveg ónýt. Ég ætla ekki að fara í dag, en ég ætla svo sannarlega að fara á morgun. Þessi síðast vika verður tekin með trompi :D
 
 

8 dagar í 80 kg ;)

Þetta mjakast svo sem ;) Er samt ekki alveg viss að ég nái að vera 81 kíló slétt á morgun eins og ætlunin var. En ég held samt að ég verði ekki langt frá því. Vona bara hið besta ;)
 
Svona var nú dagurinn:
 
Brunch (vaknaði svo seint sko): Egg og beikon.
Millibiti: Kolvetnasnautt súkkulaði og 3 kolvetnissnauðar kexkökur.
Kvöldmatur: Brokkolígratín með rækjum.
 
Þessi kvöldmatur var svakalega góður. Gerði bara brokkolígratín með miklum osti, kryddaði með salti, pipar og hvítlaukskryddi og bætti svo slatta af rækjum út í. Namminamm. Ég er líka pakksödd núna. Hugsa samt að ég fái mér eitthvað seinna í kvöld, sérstaklega ef ég stend við það að taka til. Er samt alveg afvelta núna og get varla ímyndað mér að ég nenni því, hahaha. En heildin sem komin er gerir ca 1115 kkal. og 20 grömm kolvetni. Ef ég bæti við 100 grömmum af jarðarberjum í kvöld fer þessi tala upp í ca 1140 kkal. og 25 grömm kolvetni. Get nú alveg sætt mig við það ;)

Ryksugan á fullu, étur alla drullu...

Ég er að taka og taka og taka til. Reyndar er ég bara búin að vera að brjóta saman þvott í allan dag. Þvílík þvottahrúga sem beið mín. En hér skal vera orðið fínt og flott á morgun. Ætla að njóta sunnudagsins í hreinni íbúð, þí ég þurfi að vera í alla nótt að taka til. Ég fór ekkert í leikfimi af því að ég er svo mikið að taka til. Er búin að leyfa mér smá kolvetnasnautt súkkulaði sem svona tiltektarnammi, en reyndar er ég bara ekkert búin að vera í neinu óhófi. Set inn á eftir hvað ég hef borðað og svona ;)

9 dagar í 80 kg ;)

Getur það verið??? Mér finnst svo hrikalega stutt síðan það voru þrjátíuogeitthvað dagar í þetta. Svei mér þá.
 
En allavegana líður mér mun betur í dag. Ég sleppti samt ræktinni, lagði bara ekki í það eftir reynslu gærdagsins. En ég ætla að fara á morgun. Það sem ég er búin að borða í dag er þetta:
 
Morgunmatur: Egg og beikon.
Hádegismatur: Soyapönnukaka með þeyttum rjóma, jarðarberjum og strásætu.
Millibiti: 1 lítil krembolla.
Kvöldmatur: Buff með léttsteiktu grænmeti og rjómasoðsósu.
 
Samtals er þetta um 1260 kkal. og 35 grömm kolvetni. Það má svo vel vera að ég stelist í eitthvað meira í kvöld. Ætla nú að reyna að láta krembollurnar í friði samt, alveg rúmlega 15 grömm kolvetni í einni slíkri ;)
 
Annars er ég bara að reyna að laga smá til hérna. Verð að koma íbúðinni í horf svo það sé hægt að fara að skipuleggja hvað á að hafa með í sumarfríið. Svo nenni ég bara engan vegin að koma heim úr fríi í eitthvað helvítis drasl.

Úff og púff!!!

Þvílíkur dagur!
 
Ég vaknaði með krökkunum í morgun, kom þeim af stað og keyrði í leikskólann, alveg að drepast í maganum. Hafði enga lyst á morgunmat eða neinu, var bara með þennan skemmtilega niðurgang. Svo ég bara skreið upp í ból aftur og lagði mig. Vaknaði svo um hádegi og ákvað að hitta vinkonu mína niðri í bæ á kaffihúsi. Leið aðeins skár, en samt alltaf með einhverjar magapílur. Var alveg að drepast úr hungri og pantaði mér sjávarréttasalat, mjög girnilegt. Nema ég var næstum farin að æla þegar ég tók fyrsta bitann, svona var nú matarlystin glæsileg. Píndi mig samt til að borða svona helminginn af þessu. Svo druslaðist ég bara heim aftur og lagði mig meira.
 
Síðan sótti ég kallinn í vinnuna og svo krakkana á leikskólann og skreið svo upp í sófa, enn með ógleði og magaverki. Síðan um sexleytið þá hélt ég að ég væri orðin nokkuð góð og fór svaka borubrött í leikfimi. Púlaði í 25 mín á Orbitrekkinu og byrjaði svo á tækjaprógramminu, en hreinlega gafst upp eftir fyrsta tækið. Þá var ég bara skjálfandi og titrandi, óglatt eins og ég veit ekki hvað, í svitakasti og með svima. Alveg pottþétt verið líka út af því hversu lítið ég hafði getað borðað. Keypti mér jarðaber og át nokkur, sem löguðu þetta smá þannig að ég kom við á McDonalds og keypti kvöldmatinn þar, skreið svo heim og er bara búin að eiga heima í sófanum í kvöld. Hafði samt fyrir því að útbúa mér pönnsu (átti til tilbúna) með rjóma og jarðarberjum. Er aðeins skárri núna.
 
Matarlega var dagurinn svona:
 
Morgunmatur: Enginn.
Hádegismatur: Sjávarréttasalat.
Orkubiti: 3 jarðarber.
Kvöldmatur: McDonalds Bacon Ranch salat með dressingu.
Kvöldkaffi: Soyapönnukaka með þeyttum rjóma, jarðarberjum og smá strásætu. Ca 30 grömm kolvetnasnautt súkkulaði.
 
Þetta gerði nú ekki meira en ca 875 kkal. og 29 grömm kolvetni. Æ nó, verið ekkert að benda mér á að kaloríurnar voru fáar, ég veit það alveg. Hafði bara afskaplega litla lyst í dag þó hún hafi aðeins skánað með kvöldinu. Hef bara nákvæmlega enga lyst á neinu meira núna og það er sko ekki líkt mér.
 
En ég ætla sko að fara varlega með leikfimina á morgun. Verð bara að sjá til hvernig ég verð. Vil ekki lenda í þessu aftur.
 

11 dagar í 80 kg *hóst*

Ég er bara ekkert dugleg. Eða ok, ég er smá dugleg. En ég hreinlega nennti bara engan vegin í leikfimi eins og ég ætlaði. Var bara alveg búin á því þegar ég kom heim úr vinnunni og steinsofnaði í sófanum. (Stalst líka til að éta súkkulaði í vinnunni, kolvetnasnautt að vísu. Jájá, þetta er svo sem allt í lagi).

Morgunmatur: Egg og beikon.
Millibiti: Smá kolvetnasnautt súkkulaði.
Hádegismatur: Kaldur diskur með eggjahræru, reyktum laxi og grænmeti.
Millibiti: Smá meira kolvetnasnautt súkkulaði :Þ
Kvöldmatur: Kjúklingabringur með léttsteiktu grænmeti og rjómasoðsósu.

Samtals gerir þetta um 1400 kkal. og 28 grömm kolvetni. Ætla að reyna að fá mér ekkert meira í kvöld. Ætti bara að drullast snemma í bólið. Er grútsyfjuð eftir þessa vaktatörn hjá mér með óvæntu næturvaktinni. En af fyrri reynslu veit ég að ég fer ekkert snemma í bólið.

Jæja mæja, ég verð þá bara að sætta mig við ef ég næ ekki 80 kílóunum á settum tíma. Reyni þá bara að komast eins nálægt því og ég get. En tíminn er svo sem ekki enn útrunninn, allt getur gerst ;) Verð nú að segja að það er ekkert smá frábært að vera loks laus úr 87 kg gildrunni. Núna er ég mjög svipuð og ég var áður en ég varð ólétt af Örnu, þ.e. áður en ég fór að fitna upp úr öllu valdi. OG ÞAÐ ER SKO FRÁBÆR TILFINNING :D

12 dagar í 80 kg ;)

Vá, hrikalega styttist í þetta. Ég verð að taka mig á þessa síðustu daga til að ná markmiðinu. Dagurinn í dag var ekkert mjög skipulagður eða reglulegur með tilliti til máltíða, enda svaf ég til hálfþrjú eftir næturvaktina. En ég fékk mér smá kolvetnasnautt kex þegar ég vaknaði, borðaði svo kvöldmat þar sem ég hafði kjúklingabringur og brokkolígratín. Síðan fékk ég mér smá jarðhnetur og aðeins seinna nokkur jarðarber. Svo áðan þá langaði mig svo í eitthvað gott að ég bakaði soyapönnukökur og fékk mér eina með niðurskornum jarðarberjum, þeyttum rjóma og smá strásætu. Þetta gerði samtlas í dag um 1290 kkal. og 40 grömm kolvetni. Kolvetnin alveg á mörkunum þarna, haha, en sleppur samt ;)

Á morgun er ég á dagvakt og svo er ég komin í frí fram á þriðjudagskvöld. Það er ágætt, því það er sko nóg að gera. Þurfum að fara að gera klárt fyrir ferðalagið okkar. Já bíllinn er kominn á númer aftur. Gekk nú ekki alveg stórslysalaust en þið getið lesið um það hér. Ég hef ekki komist í leikfimi út af þessu bílaveseni, en stefni sko að fara á morgun.

Jæja, ætla að fara bloggrúntinn og skella mér svo í notalegt bað :D

Ekki alveg staðföst

Ég var nú bara ekkert að passa mig neitt sérstaklega í gær og í nótt. Málið var nú eiginlega að ég var á kvöldvakt í gær. Mætti sem sagt í vinnu klukkan hálfþrjú um daginn. Svo um klukkan hálfsex hringdi ein sem átti að koma á næturvakt og sagðist ekki komast þar sem hún væri veik. Og þar sem ég var með ábyrgðina á deildinni í gær var það ég sem þurfti að redda aukamanneskju á næturvakt. Það var bara ekki hræða til í að vinna næturvaktina, og reyndar bara flestir ekkert heima hjá sér. Það er sumar og fólk skreppur út úr bænum þegar það á frí. Svo ég neyddist hreinlega til að taka vaktina sjálf. Þetta varð sem sagt 16 tíma törn, hefði verið tæplega 17 tíma ef ég hefði ekki stungið af aðeins fyrr til að geta keyrt kallinn í vinnuna og tekið krakkana. Bjöggi byrjar nefninlega klukkan sjö í vinnunni, en leikskólinn hjá Hjalta opnar ekki fyrr en hálfátta.

En sem sagt, ég var náttúrulega ekkert viðbúin að fara á næturvakt, var ekki með neitt nesti með mér og var bara svolítið pirruð og þreytt og át bara það sem var á boðstólnum. M.a. fisk í raspi (rasp er á bannlistanum mínum) og tvær litlar kartöflur (sem eru líka á bannlista). Svo bara át ég örugglega allt of mikið, var bara ferlega svöng eitthvað. En jájá, dagurinn í dag verður betri.

14 dagar í 80 kg ;)

Jæja, ég er vöknuð eftir næturvaktina. Steig á vigtina og varð ekkert smá ánægð. 82,0 kg!!! 1,2 kg farin þessa vikuna. Náði sem sagt markmiðinu þrátt fyrir allt og smá meira til ;) Samt er ég á blæðingum sem fær mig nú yfirleitt til að blása svolítið upp og safna á mig bjúg. Svo mældi ég sentimetrana og þeir komu bara vel út líka :D

Brjóst:............102 cm (102)
Mitti:...............77 cm (78)
Magi...............99 cm (101)
Mjaðmir:..........99 cm (100,5)
Upphandleggur:.32 cm (32)
Læri:................61 cm (62)
Kálfi:................39 cm (39)

Mittið, majðmirnar og maginn er greinilega að minnka, og meira að segja einn sentimetri farinn af lærinu :D

Nenni ekki að skrifa nákvæmlega það sem ég borðaði í gær, enda svo mikið rugl á máltíðunum svona á næturvöktunum. En þetta var allavegana egg og beikon, jarðaber og smá súkkulaði ásamt smá hnetum, kjúklingur með salati og AB dressing og nokkrir BabyBel ostar sem snakk. Ég fer ekki í leikfimi í dag þó ég hefði gjarnan viljað. Vaknaði klukkan hálfþrjú og ræktin lokar klukkan fjögur... og ekki get ég keyrt þangað *grrr*

En já, fyrst ég er orðin 82 kg þá má segja að ákveðnum áfanga sé náð. Síðan ég byrjaði í átakinu mínu í janúar 2003 eru farin 35 kg :D

15 dagar í 80 kg og vigtunardagur á morgun

Jájá, mér gengur bara ágætlega held ég. Næturvakt aftur í nótt. Annars er ég alveg brjáluð núna, það var nefninlega klippt af bílnum okkar áðan. Forsendurnar voru þær að það væri ekki búið að borga umskráningargjaldið, en það er bara helvítis kjaftæði, því við borguðum það í september í fyrra. Ég er bara svo fokvond að þeir geri þetta á laugardegi þegar allar skrifstofur eru lokaðar og ekkert hægt að hringja og láta leiðrétta þetta. Þannig að við erum bara bíllaus og ég er öskuill. Alveg býst ég líka við einhverju bölvuðu veseni að fá þetta leiðrétt, í þessu helvítis býrókratíulandi hér. Það er það eina sem ég ÞOLI ekki við Noreg, þetta pappírsflóð og vesen á öllu, skriffinska og engin liðlegheit.

Jæja, fokk, ég er farin í vinnuna... LABBANDI!!!

16 dagar í 80 kg og plönum nú hitting í ágúst :D

Ég er mjög ánægð með daginn í dag. Staðið mig með prýði og fór líka í leikfimi.

Morgunmatur: 2 sneiðar Lindbergbrauð með L&L, skinku og osti annars vegar, og smurosti og salami hins vegar.
Hádegismatur: Ferskt salat með skinku og ostbitum, smá dressing.
Millibiti: 3 BabyBel ostar.
Orkubiti: 15 gr. kolvetnasnautt súkkulaði.
Kvöldmatur: Soðinn þorskur með gratíneruðu brokkolí.

Þetta gerir ca 1015 kkal. og 25 grömm kolvetni. En ég er að fara á næturvakt í nótt svo það er á hreinu að það bætist smá við. Ég ætla bara að plana fyrirfram hvað ég borða í nótt. Ég ætla því að taka með mér eitt kjúklingalæri og soðið brokkolí með því, ásamt 100 gr. af jarðaberjum og smá rjóma til að gæða mér á. Ég verð alltaf að borða eina almennilega máltíð á næturvöktunum, þá finn ég ekkert þessa nartþörf alla nóttina sem ég annars er með. En þá mun heildin verða um 1365 kkal. og 32 grömm kolvetni. Mér finnst það nú bara ansi gott fyrir rúman sólarhring með vöku. Var sko á dagvakt í dag líka, er að taka aukavakt í nótt. Reyndar lagði ég mig í alveg heila 1,5 tíma í dag :þ

En já, svo er það spurning með HITTING. Ég mæli með miðvikudeginum 18. ágúst eða fimmtudeginum 19 ágúst. Þá er Valla komin aftur frá Noregi, ég enn á landinu og Lauga í Reykjavík. Hvað segið þið hinar? Ég hugsa að ég gæti alveg boðið ykkur "heim", því við verðum með íbúð í láni. Eða kannski einhver önnur sem vill hafa heimboð. Kannski sniðugara en að hittast á kaffihúsi upp á að við getum þá slegið saman í púkk og tekið með mat sem við megum borða ;) Getum bara hist seinnipartinn eða um kvöldið og átt góða stund saman. Endilega komið með hugmyndir, en þetta eru svona mínar uppástungur.

Jæja, ætla að skella mér í bað áður en ég fer í vinnuna, nennti ekki í sturtu í ræktinni.

17 dagar í 80 kg ;)

Jæja, enn styttist í takmarkið mitt. Ég er nú reyndar hálf svartsýn á að ná að komast í 82,1 kg á sunnudaginn, en ég geri mitt besta ;) Ekki annað hægt. Ég var á kvöldvakt í kvöld, hún er sko frá 14:30-22:30. Borðaði morgunmat eftir að búið var að koma krökkunum í leikskólann, lagði mig svo og svaf af mér hádegismatinn, fékk mér svo bara smá súkkulaði áður en ég rauk í vinnu og borðaði svo miðdegisverð um klukkan 17. Svo fékk ég mér smá hnetur um kvöldið. Annars var mikið að gera í vinunni og lítill sem enginn tími til að slaka á, en svona er þetta nú oft á þessari deild.

Morgunmatur: Egg og beikon.
Hádegismatur: Enginn.
Orkubiti: Ca 30 gr kolvetnasnautt súkkulaði.
Miðdegisverður: Roastbeef með salati og fetaosti, smá AB-mjólkurdressing.
Kvöldsnarl: Ca 50 gr. blandaðar hnetur.

Samtals var þetta um 1045 kkal. og 34 grömm kolvetni. Get alveg verið sátt við það. Vona bara að vigtin verði sammála mér :Þ Fer í leikfimi á morgun ;)

18 dagar í 80 kg ;)

Þetta er búinn að vera þokkalegur dagur held ég bara. Datt svolítið í súkkulaðið samt, ætlaði eiginlega ekki að gera það, en reyndi nú að hemja mig aðeins :Þ

Morgunmatur: Egg og beikon.
Hádegismatur: Ferskt salat með rækjum, túnfiski, fetaosti og smá dressingu.
Orkubiti: Jarðaber og kolvetnasnautt súkkulaði (namm, namm).
Kvöldmatur: Roastbeef og léttsteikt grænmeti og sveppir, smá hvítlauksdressing.
Kvöldsnarl: Kolvetnasnautt súkkulaði.

Kaloríurnar urðu svolítið margar út af þessu súkkulaði og kolvetnin líka; ca 1630 kkal. og 45 grömm kolvetni. En það er þegar ég reikna með helming sykuralkóhólanna. Annars væru kolvetnin ekki nema ca 32 grömm. Veit ekki alveg hvernig ég á að reikna þetta. Mér finnst svolítið mikið að reikna alveg helminginn en of lítið að sleppa þeim alveg, eða reikna þessi 5% sem ég gerði alltaf fyrst, en virtist alveg virka á meðan ég datt ekki gjörsamlega í þau. Well, held mig við þennan helming í bili.

En ég fór nú allavegana í leikfimi :D

Sofðu klukkutíma lengur og þú léttist

Þetta var ég nú að lesa í Aftonbladet á netinu, sænskt blað. Þar segir að rannsóknir bendi til að þeir sem sofi lítið gangi verr að léttast en þeir sem sofa vel og lengi. Ein ástæðan er nefnd sú að framleiðsla leptins, en það er hormónið sem stjórnar saðseminni, er seytt út í líkamann þegar maður sefur. Önnur ástæða gæti nú bara verið að það er erfitt að borða á meðan maður sefur ;) En allavegana þá var töluverður munur á þeim sem sváfu lengi og þeim sem sváfu stutt. Það er reyndar þekkt að þeir sem þjást af svefnvandamálum eiga oft einnig við leptin-skort að stríða. Vísindamenn hallast líka að því að hormón og efni sem stuðla að fitubrennslu og saðsemistilfinningu virki betur ef maður sefur vel, en viðurkenna svo sem að þeir sem sofi stutt hafa líka meiri tíma til að éta :Þ

Þannig að stelpur mínar, nú skulum við bara sofa sem mest og sofa af okkur spikið, hahaha.

Aftonbladet: Sov en extra timme - och gå ner i vikt

19 dagar í 80 kg ;)

Jæja, uppgjöfin er liðin hjá. Takk fyrir peppið stelpur. Ég var reyndar alveg að farast úr nammi- og sætindaþörf áðan, en fann svo þetta snilldar "sælgæti" sem ég má borða. Ég man ekki hver það var sem benti á að jarðaber séu ekki svo kolvetnarík miðað við ávexti, en vá takk sko fyrir það. Ég nefninlega keypti jarðaber í gær fyrir krakkana og mundi svo eftir þessari athugasemd um að þau væri ekki mjög kolvetnarík. Ég fékk mér því smá AB mjólk með jarðaberjum og smá strásætu út á rétt áðan, og namminamminamm hvað þetta var gott. Ekki nema um 8 grömm kolvetni í þessu sælgæti og þar af voru reyndar flest kolvetnin úr AB mjólkinni, eða Cultura eins og hún heitir hér. Þannig að ég sé að ég get líka af og til fengið mér eintóm jarðaber sem snakk og sælgæti. Ætti kannski að prófa að frysta þau og gá hvort þau séu góð svoleiðis, sm.br. frosnu vínberin hennar Bryndísar :D

Dagurinn var svona:

Morgunmatur: 2 sneiðar Lindbergbrauð með smurosti og skinku annars vegar, og L&L og osti hins vegar.
Hádegismatur: Egg og beikon.
Miðdegisverður: Nautakjöt steikt á pönnu ásamt léttsteiktu grænmeti.
Kvöldsnarl: Cultura (AB mjólk) með jarðaberjum og smá strásætu.

Heildin gerir um 1040 kkal. og 30 grömm kolvetni.

Er ekkert smá ánægð með þessa jarðaberjauppgötvun, enda eru fersk jarðaber seld út um allt núna, svaka góð :D

Ég fór ekki í leikfimi í gær, ætla að fara ca annan hvern dag og reyna að fara fjórum sinnum í viku. Ætla sem sagt í leikfimi á morgun.

Mig vantar pepp!!!

Er í einhverju uppgjafarkasti núna, nenni þessu ekki. Plís, smá pepp væri gott núna. Mig langar bara að gúffa í mig lompum (svipaðar flatkökum) og brauði, sælgæti og hnetum, vinarbrauði og kökum. HJÁLP!!!

Kökuskrímslið ógurlega

Ó stelpur, ég tók kast í nótt. Það var ein sem bakaði köku og kom með í vinnuna, og ég gjörsamlega missti mig. Bara át og át og át eins og þetta væri síðasti dagur lífs míns. Jamm, fékk auðvitað samviskubit, en mikið hrikalega var þetta samt GOTT!!! En jæja, þýðir ekkert að halda svona áfram ef ég ætla að ná markmiðinu. Var nú samt "bara" 83,5 kg í morgun eftir þetta sukk, en ég þarf nú að komast niður í 82,1 fyrir næsta sunnudag.

Ég fór í leikfimi áðan, ánægð með það. Ég er náttúrulega ekki enn búin að snúa sólarhringnum við eftir næturvaktirnar, enda var síðasta vaktin bara s.l. nótt. Borðaði kjötbollur með smá chilisósu í "morgunmat", svona tilbúinn snakkmatur sem ég keypti bara úti í búð. Svo fékk ég mér steikta pylsubita og grænmeti í kvöldmat eftir leikfimina og leyfði mér svo eitt kolvetnasnautt súkkulaði frá Lenu. Á umbúðunum stendur að það séu 3,7 grömm nettto kolvetni í því en ég taldi helming sykuralkóhólanna með líka. Svo heildarkolvetnamagnið er komið upp í ca 40 grömm, en kaloríurnar ekki nema um 870 kkal. En ég náttúrulega borðaði fyrstu máltíðina um klukkan 16 og ég ætla að fá mér smá kvöldsnarl seinna í kvöld. Reyni bara að hafa það kolvetnasnautt ;) Ætli ég fái mér ekki bara egg og beikon :D

21 dagur í 80 kg, vigtunar- og mælingadagur

Þá er kominn sunnudagur aftur. Samkvæmt planinu ætlaði ég að vera 83,2 kg í dag og vigtin sýndi einmitt 83,2 kg. Enginn stórárangur svo sem, þar sem ég var 83,4 kg s.l. sunnudag, en ég er samt á áætlun. Svo verð ég kannski bara að vera ánægð með þetta þar sem ég er a.m.k kosti búin að komast að því að ég verð að passa mig aðeins á low-carb sælgætinu. Já og svo gúffaði ég í mig pizzu í nótt og miðað við það er nú bara stórkostlegt að ég hafi ekki verið 85 kg í dag ;Þ En ekki nennti ég í leikfimi áðan, það lokar klukkan 16 og ég var bara að skreiðast á fætur eftir næturvaktina. Æ já, fer bara á morgun, þá er opið til 21 og ég get verið búin að sofa almennilega og hressa mig við eftir næturvaktina í nótt.

En svo voru það mælingar líka:

Brjóst:............102 cm (102)
Mitti:...............78 cm (79)
Magi...............101 cm (102)
Mjaðmir:..........100,5 cm (101)
Upphandleggur:.32 cm (32)
Læri:................62 cm (62)
Kálfi:................39 cm (39)

Ekki voru það miklar breytingar frá síðustu mælingum, átti svo sem ekkert von á því. Nema er ánægð með að mittið og maginn virðist aðeins vera að minnka. Og brjóstin minnka líklega ekki endalaust, sem betur fer, hahaha ;)

Svo verð ég bara að vera rosa dugleg næstu viku, ekkert svindl og rugl, og ekki of mikið low-carb nammi (bara smá ;) Markmiðið er svo að vera orðin 82,1 kg næsta sunnudag.

22 dagar í 80 kg ;)

Hmm, þetta styttist óðum sko. Annars hef ég nú ekki misst mikið þessa viku, farið svolítið upp og niður aftur. En takmarkið var að vera 83,2 kg á morgun, skulum nú sjá hvort það tekst. Var reyndar að vonast til að verða enn léttari þar sem ég var orðin 83,4 kg síðasta sunnudag, en ég verð bara að bíta í það súra epli að hafa borðað of mikið af kolvetnum. Jæja, við sjáum til hvað vigtin segir á morgun. Annars þá ætla ég að borða algjört lágmark af kolvetnum fram að vinnu því vinnufélagarnir voru búnir að dobbla mig til að kaupa með þeim pizzu. Pizzur eru nú yfirleitt algjört eitur fyrir mitt mataræði, ég blæs oftast upp og þyngist um 2 kg eftir að hafa borðað svoleiðis. En hann Martin sæti hjúkkustrákur fullvissaði mig um að það væri hægt að fá pizzur með örþunnum botni svo ég ætla að prófa það.

Annars held ég að ég setji ekkert upp dagana matarlega séð á meðan ég er á næturvöktunum, það fara allar máltíðir úr skorðum hvort sem er. Týpískt er nú líka að það skal alltaf vera svo frábært veður þegar ég er á næturvöktum og þarf að sofa allan daginn :S

Allt úr skorðum

Ég var búin að plana þennan dag bæði með tilliti til mataræðis og leikfimi, en svo fór allt úr skorðum. Málið er að þetta var síðasti dagurinn hans Hjalta hjá yndislegu heimafóstrunni hans svo hún bauð okkur í kaffi þegar við sóttum drenginn. Þar var boðið upp á kökur og kaffi og ég stóðst ekki mátið og fékk mér eina litla súkkulaðikökusneið og aðra af einhverskonar sandköku. Svo sátum við þarna auðvitað í einhvern tíma og síðan ætlaði ég að drífa mig í leikfimi þegar ég fattaði að þeir eru búnir að breyta i sumaropnun hjá sér. Loka sem sagt klukkan 18 í stað 20, svo ég komst ekkert í leikfimi heldur. En það verður bara að hafa það. Verst er að ég kemst ekki í leikfimi á morgun heldur eins og ég ætlaði, því Bjöggi er búinn að lofa sér til vinar síns að hjálpa honum eitthvað og þá fer hann á bílnum. En það þýðir að ég fer ekki í leikfimi. Það er bara opið til 16 á morgun og ég veit alveg að ég nenni ekki að fara að hjóla upp í líkamsræktarstöð þegar ég er ekki búin að sofa almennilega eftir næturvaktina. Reyni að fara á sunnudaginn.

Of mikið súkkulaði?

Jæja stelpur, ég steig á vigtina í morgun og var bara ekkert sátt við hana. Hafði þyngst smá frá í gær. Þannig að ég held að ég fari að passa mig í low carb namminu. Það sakaði nú samt ekkert í síðustu viku, en þá borðaði ég nú reyndar töluvert minna af því. Þannig að í dag og á morgun verð ég bara að vera mjög ströng á nammið svo ég nái nú markmiðinu mínu. Kannski ég ætti bara að fara að reikna með helming kolvetnanna frá sykuralkóhólunum, þá er ég allavegana nokkuð seif myndi ég halda. Svo er annað sem ég hef slugsað með núna sem ég gerði ekki í síðustu viku, en það er að vera að narta seint á kvöldin. Ég get reyndar ekki sleppt því um helgina þar sem ég er að fara á næturvaktir, hehe. En ég náttúrulega sef allan daginn þegar ég er á næturvöktunum, svo ekki borða ég þá.

En ég ætla endilega að prófa pastað sem Lena sendi mér á eftir. Það eru engin sykuralkóhól í því ;) bara alvöru kolvetni, en miklu minna af þeim en í venjulegu pasta :D Eins með brauðið.

24 dagar í 80 kg ;)

Jæja, ég ætlaði að vera svo dugleg að taka til í dag, en nei nei, steinsvaf bara á mínu græna í mest allan dag. Well, það er svo sem voða gott að eiga svona letidaga líka. Þetta varð reyndar til þess að ég borðaði engan hádegismat. Ég nefninlega fór á fætur snemma í morgun og kom krökkunum á leikskólann, fékk mér svo morgunmat og lagði mig. Svo vaknaði ég ekkert aftur fyrr en klukkan hálfþrjú, fór í bankann og smá stúss, sótti svo krakkana og eldaði miðdegisverð. Jájá, það er alveg í góðu lagi ;) En ég er búin að vera svolítið ferleg í low-carb namminu í dag, hahaha. Nei nei, ekkert agalega ferleg svo sem. Hef fengið mér oft, en mjög lítið í einu.

Morgunmatur: Egg og beikon.
Hádegismatur: Enginn ;)
Miðdegisverður: Bixímatur gerður úr grillafgöngunum frá í gær og grænmeti, smá rjómasoðsósa.

Svo er ég búin að narta í low-carb hlaup og súkkulaði í allan dag, ég á samt nóg eftir sko. Í heildina er ég búin að fá mér svona 10 hlaupbangsa, 6 litla súkkulaðimola og eitt súkkulaðistykki (42 gr) sem ég var að borða núna rétt áðan. Heildin gerir um 1230 kkal. og 20 grömm kolvetni. Getur vel verið að ég fái mér eitthvað meira á eftir yfir sjónvarpinu, sé til. Ég á kolvetnasnautt snakk sko, alveg laust við öll kolvetni, enda eiginlega bara fita :Þ Ja, reyndar held ég að ég fái mér bara eina sneið af Lindbergbrauði og eitthvað gott álegg. Sé að mig vantar smá meiri alvöru næringu ;) Segjum það bara. Þá breyast hitaeiningarnar í ca 1365 kkal. og kolvetnin í 25 grömm.