Svindlið ógurlega :0

Já, verð að viðurkenna að ég svindlaði. Það læddist einn hlaupkarl upp í mig áðan. Fór nefninlega í labbitúr með krökkunum og keypti helling af nammi til að eiga fyrir Halloween krakkana í kvöld, og auðvitað mína krakka líka. Áður en ég vissi af var ég búin að stinga einum hlaupkarli upp í mig og gleypa. En þetta var líka eina svindlið mitt ;Þ

Svona lítur dagurinn út:

Morgunmatur: 2 sneiðar Lindbergbrauð með L&L, skinku og eggjum.
Hádegismatur: Ofnbakaðar kjúklingabringur með gráðosti í vasa, léttsteikt grænmeti og smá sósa.
Miðdegisverður: Kefir með strásætu. 1 sneið Lindbergbrauð með léttsultu og osti.
Kvöldsnarl: Niðurskornar gulrætur og brokkolí með ídýfu gerðri úr léttum sýrðum rjóma.
Millibiti: 1 hlaupkarl. 1 pk Solano (sykurlaus brjóstsykur með karamellubragði).

Heildartölurnar eru samkvæmt þessu um 1100 kkal. og 40,5 grömm kolvetni.

Fór líka í ræktina í hádeginu og fékk nýtt prógramm. Ekkert heví púl núna, bara 10 mínútur á Orbitrekinu í upphitun og fór svo einn hring með leiðbeinandanum í tækin til að prófa. Nennti ekkert að æfa neitt meira en þetta núna, enda er ég búin að fara svo mikið í ræktina að undanförnu. Ælta svo að taka mér frí á morgun. En ég fór náttúrulega í labbitúr með krökkunum áðan, svona 30 mínútna labb ;) Svo ég er alveg búin að fá ágætis hreyfingu í dag.

Hamingja, hamingja ;D

Elsku besta vigtin mín er svo góð við mig... eða bara ég svona dugleg :D Ég var 77,0 kg í morgun ;D. Sem sagt 1,6 kg farin í þessari viku. Gæti bara ekki verið ánægðari. Mig vantar núna 100 grömm upp á að 40 kg séu farin í heildina, vá!

Yndislegt að borða góðan mat :D

Já, það er svo frábært að geta verið í megrun en samt borðað rosa góðan mat :D Eldaði svo góðar kjúklingabringur í miðdegisverð, skar svona vasa á þær og setti gráðost inn í, kryddaði smá og eldaði í ofni í ca 40-50 mín. Hafði svo léttsteikt grænmeti með og smá sósu. Svo ætla ég sko að fá mér ís á eftir þegar ég er hætt að vera svona pakksödd, hahaha. Annars er matarplanið svona í dag:

Morgunmatur: Enginn (alltaf sofandi sko, á svo góðan kall sem leyfir mér að sofa út ;).
Hádegismatur: Egg og beikon.
Miðdegisverður: Ofnbakaðar kjúklingabringur með gráðosti í vasa, léttsteikt grænmeti og smá sósa.
Kvöldsnarl: 1 sneið Lindbergbrauð með léttsultu og osti.
Millibiti: 1 mini BabyBel ostur, low carb hindberjaís, 1 pk Läkerol salvi.

Þetta gerir samtals um 1290 kkal. og 22 grömm kolvetni.

Ég fór líka í ræktina áðan og fannst þetta frekar erfitt í dag. Stundum er ég svo full af orku og finnst þetta ekkert mál, og stundum finnst mér þyngdirnar svakalega þungar ;) Reyndar hef ég tekið eftir þessu að ef ég fer tvo daga í röð þá er ég frekar svona þreytt seinni daginn. En ég fer samt í ræktina á morgun. Það verður samt ekkert mikið púl á ég von á, þar sem ég er bara að fara að hitta leiðbeinandann minn og fá nýtt prógramm. Held ég taki mér svo pottþétt pásu á mánudaginn, annars finnst mér þetta eignlega bara verða of mikið.

Svo er vigtunardagur á morgun ;) Spennó ;D

Kjólaleit

Já mig langar svo hrikalega í nýjan kjól fyrir jólaborðið á föstudaginn. Fór áðan og leitaði og leitaði og fann bara engan sem mér leist nógu vel á. Reyndar er ekki jólakjólaúrvalið almennilega komið í búðirnar. Ég vona að það komi einhverjar vörur í næstu viku. Sá reyndar einn sem mér fannst mjög flottur í sniðinu, en ég er ekki viss með litinn. Hann er nefninlega svolítið bleikur og ég bara veit ekki hvernig það fer mér. Þarf að fá einhvern til að skoða hann með mér. Svo fann ég annan sem var rosa elegant, vínrauður og svaka flottur. Smellpassaði... nema var of þröngur yfir brjóstin *urr*.

En já í gær. Ég var svo södd eftir ísinn að ég fékk mér aldrei grænmetissnakkið. Eins fékk ég mér bara einn BabyBel ost, ekki tvo. Svo í gær urðu kaloríurnar ekki fleiri en um 990 kkal. og kolvetnagrömmin 33. Kem með matseðil dagsins í dag á eftir. Ætla svo að reyna að fara í ræktina seinna í dag.

Mmmmm, nammidagur ;D

En samt bara hollur nammidagur og ekkert svindl ;) Ég bara bjó til svo góðan kvöldmat, nautafilé með rjómasósu og léttsteiktu grænmeti (kartöflur fyrir hina fjölskyldumeðlimina) og svo gerði ég líka heimatilbúinn ís sem er að frystast. Hlakka ekkert smá til að fá mér af honum. Held að hann sé hrikalega góður. Setti helling af hindberjum í hann, en þau innihalda aðeins 21 kkal. og 3,2 grömm kolvetni í hverjum 100 grömmum. Og auðvitað var ísinn gerður með strásætu en ekki sykri ;)

Svona er þá matseðill dagsins:

Morgunmatur: 2 sneiðar Lindbergbrauð, önnur með smurosti og skinku, og hin með léttsultu og osti.
Hádegismatur: 1 sneið Lindbergbrauð með L&L, skinku og eggjum.
Miðdegisverður: Nautafilé með léttsteiktu grænmeti og smá rjómasósu.
Kvöldsnarl: Niðurskornar gulrætur og brokkolí með ídýfu gerðri úr léttum sýrðum rjóma.
Millibiti: Low carb hindberjaís. 2 Mini BabyBel ostar.

Þetta gerir um 1210 kkal. og 40 grömm kolvetni. Ekki slæmt fyrir "nammidag". En ég er sko alvarlega að hugsa um að gera svona ís á jólunum og hafa sem eftirrétt :D Ég notaði uppskriftina sem ég setti inn á uppskriftasíðuna mína og bætti bara við 300 grömmum af hindberjum og sleppti öðrum bragðefnum.

Svo fór ég í ræktina í dag og prófaði svona pallatíma. Mér hefur reyndar alltaf þótt rosa gaman í pallatímum, bara langt síðan ég hef farið. Kom mér á óvart að tíminn var eiginlega bara of léttur fyrir mig. Næst ætla ég að hækka pallinn, þ.e. ekki hafa hann í lægstu stöðu eins og núna ;)

Jæja, farin að kose meg yfir sjónvarpinu og Beat for Beat ;)

Og ein enn ;)

Þá er hún Selma að fara að byrja með átaksblogg ;) Alltaf gaman að fá fleiri í hópinn :D

Komst í ræktina ;D

Fyndið hvað maður er orðinn háður þessu. Leið alveg rosalega vel að geta farið og púlað smá ;) Svo pantaði ég tíma hjá leiðbeinandanum mínum til að setja upp fyrir mig nýtt prógramm, á að hitta hana á sunnudaginn.

Matseðillinn í dag var svona:

Morgunmatur: 2 sneiðar Lindbergbrauð með smurosti og skinku.
Hádegismatur: Ferskt salat með skinku og osti, smá dressing.
Miðdegisverður: 2 sneiðar Lindbergbrauð, önnur með smurosti og skinku, hin með gráðosti og léttsultu.
Kvöldsnarl: Eggjahræra með beikoni, grænmeti og bræddum osti.
Millibiti: 2 pk. Fruittella light og 1 pk Läkerol original.

Samtals gerði þetta um 1250 kkal. og 29,5 grömm kolvetni.

Síðastliðinn vetur lenti ég í því að giftingarhringurinn minn var bara orðinn allt of stór. Ég var næstum búin að týna honum í eitt skiptið, þegar hann hreinlega flaug af fingrinum á mér þar sem ég var að skafa af bílnum og lenti á kafi í snjó. Fyrir einhverja hundaheppni fann ég hann aftur þegar ég lagðist á fjóra og fór að þreifa mig áfram. En allavegana fékk ég smá sjokk þarna og fór og lét þrengja hann. Ég þurfti sko að láta þrengja hann um heilar tvær stærðir... og hann sem passaði svo vel þegar við giftum okkur í maí 2002 :Þ Svo finn ég núna að hann er AFTUR orðinn vel rúmur. Reyndar ekki farinn að fljúga af mér enn, en ætli ég þurfi að fara og láta þrengja hann meira bráðum? Ætla ekki að gera það strax samt, en hann er að verða vel laus á puttanum. Ég hreinlega hélt ekki að maður fitnaði svona á puttunum, hahaha. En það er greinilegt að þeir grennast með mér ;)

Pirr pirr og urg!

Já, foj og svei. Ég komst ekki í ræktina í dag og það var EKKI mér að kenna. Er hundpirruð yfir þessu. Ekki spurning að ég fari á morgun. Að öðru leyti er dagurinn búinn að vera ágætur. Svona leit hann út:

Morgunmatur: Enginn, svaf.
Hádegismatur: Egg og beikon.
Miðdegisverður: Pylsubitar og grænmeti steikt á pönnu, smá rjómasletta.
Kvöldverður: Kefir með jarðarberjum og strásætu, 1 sneið Lindbergbrauð með léttsultu og osti.
Millibiti: 28 grömm low carb súkkulaði og 1 pk. Läkerol cactus.

Samtals gerði þetta um 1290 kkal. og 36 grömm kolvetni.

Jájá, skítsæmó. Er bara enn svekkt að hafa ekki komist í ræktina.

Hæ og hó

Var á kvöldvakt svo þess vegna blogga ég svona seint. Enn stend ég mig alveg ágætlega og hef ekkert svindlað. Fór ekkert í ræktina í dag, en labbaði heim úr vinnunni. Þannig að ég fékk smá hreyfingu. Svona var dagurinn:

Morgunmatur: 2 sneiðar Lindbergbrauð með L&L, salami og eggjum.
Hádegismatur: Enginn.
Miðdegisverður: Reyktur fiskur með smá hvítri sósu og gulrótum (eitthvað sem var í matinn í vinnunni).
Kvöldsnarl: 2 sneiðar Lindbergbrauð með Létta, skinku og osti.
Millibiti: 28 grömm low carb súkkulaði, 2 pk. Fruittella light.

Þetta gerði nú bara rétt um 1000 kkal. og 32 grömm kolvetni. Er að spá í hvort ég eigi að fá mér eitthvað meira, eða bara sleppa því. Sé til. Er nefninlega að reyna að passa að borða ekki mikið seint á kvöldin.

Föstudaginn 5. nóvember er vinnudjamm, svona jólahlaðborð ;) Mig langar alveg rosalega mikið að kaupa mér einhvern hrikalega flottan kjól og vera ógó mikil pæja. En ég verð aðeins að sjá til hvað fjárhagurinn segir. Ég bæði hlakka til og kvíði smá fyrir. Er allt of hrædd um að þyngjast aftur. En ég ætla að vera dugleg fram að djammi og passa mig að detta ekki í algjört sukk.

Hafið þið tekið eftir stelpur að það koma svona tímabil þar sem allir eru að hrósa manni fyrir hvað maður líti vel út og hvað maður hafi grennst? Ég hef alveg tekið eftir að þetta kemur í skorpum. Það er eins og á ákveðnum tímapunkti í megruninni sjáist allt í einu vel hvað maður hefur grennst. Ég er að fá rosa mörg svona komment núna, ekki leiðinlegt það ;)

Já og í sambandi við fólk sem er að pressa á mann til að borða. Ein í vinnunni bakaði köku og allir fengu sér. Hún var þvílíkt að pressa á mig til að fá mér smá sneið, bara alveg rosalega, og ég var næstum búin að láta undan. En þá hugsaði ég til Gerritar og að maður ætti ekkert að vera að láta aðra stjórna sér svona... og fékk mér ekki einn einasta bita af kökunni ;) Fékk mér bara mitt sykurlausa nammi til að japla á og var hæstánægð með mig ;)

Kolvetnadagurinn

Samt ekki hinn ógurlegi sko ;) En kolvetnin urðu í meira fallinu í dag. Í fyrsta lagi vaknaði ég svo seint að ég náði ekki að steikja mér egg og beikon, þannig að það var Lindbergbrauð bæði í morgunmat og hádegismat. Í öðru lagi var hausthátíð á leikskólanum hennar Örnu eftir vinnu, þar sem krakkarnir og foreldrarnir elduðu grænmetissúpu með pylsubitum, og steiktu norskt flatbrauð. Ég bara ákvað að leyfa mér að fá mér svolítið af þessu. Grænmetissúpan var svo sem nokkuð í lagi, fyrir utan að það voru kartöflur í henni. Og svo var flatbrauðið auðvitað ansi kolvetnaríkt. En ég fékk mér ekkert mikið af því heldur. Svo fannst mér ég bara ansi dugleg að sleppa nýbökuðu vöfflunum sem var einnig boðið upp á.

Svona varð þá dagurinn:

Morgunmatur: 2 sneiðar Lindbergbrauð með L&L, roastbeef og eggjum.
Hádegismatur: 2 sneiðar Lindbergbrauð með L&L, skinku og eggjum.
Miðdegisverður: Grænmetissúpa með pylsubitum, flatbrauð með L&L.
Kvöldverður: Kesam með strásætu og blönduðum berjum, smá rjómi út á.
Millibitar: 56 grömm kolvetnasnautt súkkulaði, 2 pk. Fruittella light.

Þetta gerði í heildina um 1440 kkal. og 56 grömm kolvetni.

En ég fór nú í ræktina í dag og eyddi einhverjum kolvetnum og kaloríum þar ;)

Ég á nú ekki von á að léttast áfram svona ört eins og í síðustu viku, en ég vona samt að vigtin fari nú niður á við, en ekki neitt upp á við aftur. Langar aldrei, aldrei, aldrei að sjá töluna 80 eða þar fyrir ofan á morgunvigtinni minni.

Íþróttaálfurinn

Svona er ég í dag (reyndar í gær :Þ) 

Dagurinn í dag

Bara smella inn matseðlinum ;)

Morgunmatur: Enginn (svaf).
Hádegismatur: 2 sneiðar Lindbergbrauð með L&L, roastbeef og eggjum.
Miðdegisverður: Kjúklingabringa með léttsteiktu grænmeti og smá rjómasósu.
Kvöldsnarl: 1 sneið Lindbergbrauð með léttsultu og osti.
Millibiti: 28 grömm low crb súkkulaði, 7 low carb karamellur, niðurskornar gulrætur og brokkolí með ídýfu úr léttum sýrðum rjóma.

Samtals var þetta um 1270 kkal. og 34 grömm kolvetni.

Annars var ég að lesa að það eiga að koma kolvetnasnauðar vörur á markað hér eftir áramót, LOKSINS :D. Er sko rosalega ánægð með þetta ;)

Vigtunardagur

Þá er komið að vigtunardeginum. ég steig því á vigtina og þar blasti við mér þessi fallega tala: 78,6 kg. Ég er sem sagt búin að gera gott betur en að ná 80 kg takmarkinu :D Það fóru alveg 2,2 kg þessa vikuna ;D Ég er sko himinlifandi með þetta. Ekki aðeins náði ég takmarkinu mínu heldur er þetta í fyrsta skiptið í næstum 10 ár sem ég er undir 80 kg.

Þegar ég var 14 ára var ég 58 kg. 16 ára var ég komin í 63 kg og 19 ára var talan 74 kg. Smám saman jókst hún svo í 80 kg, en eftir að ég átti Elísu árið 1995 (þá var ég á 25. aldursári) þá var ég í skamman tíma 78 kg. Ég nefninlega grenntist á meðgöngunni með hana. En svo þyngdist ég á brjóstagjöfinni (ein af þeim sem þyngist á brjóstagjöfinni öfugt við flestar) og var komin í ca 90 kg eftir það tímabil. En ég náði þeim kg af mér með leikfimi og aðhaldi í mataræði og komst aftur í 80-82. Þar hélt ég mér svo alveg þar til ég varð ólétt af Örnu 29 ára gömul. Ég þyngdist rosalega á þeirri meðgöngu og var yfir 100 kg þegar ég var búin að eiga. Þyngdist svo enn meira á brjósagjöfinni. Á meðgöngunni með Hjalta grenntist ég síðan smá aftur, en bætti því öllu á mig og meira til á meðan ég var með hann á brjósti. Toppaði í tæpum 117 kg þegar ég fékk loks nóg og ákvað að gera eitthvað.

Og elsku stelpurnar mínar, þetta eru því mikil tímamót fyrir mig og rosalegur áfangi. Fyrsta langtímamarkmiðið sem ég setti mér var að komast í 80 kg og ég er komin fram hjá því :D Ótrúlegt! Þegar ég byrjaði í átakinu átti ég satt að segja aldrei von á að komast svona langt. Að komast undir 100 kg fannst mér nánast óyfirstíganlegt. En hingað er ég komin og þegar ég lít til baka finnst mér þetta bara alls ekkert hafa verið sérstaklega erfitt. Jú, tekið sinn tíma, en það er sko allt í lagi, ég er alveg hætt að vera óþolinmóð. 38,3 kg eru farin á 22 mánuðum. Mér finnst ótrúlega stutt í að ná lokamarkmiðinu mínu, þ.e. 72 kg. Er meira að segja farin að gæla við að kannski komist ég í 69 kg. En ég ætla ekkert að ákveða með það strax, sjá bara hvernig ég lít út þegar ég er komin í 72 kg. Ég hélt reyndar að það væru efri mörk kjörþyngdar minnar, en þar sem ég er víst ekki enn orðin 35 ára þá ætti ég að vera 70 kg til að vera í efri mörkunum. En það munar nú ekki miklu ;) Stefni áfram á 72 kg eins og er.

Ég ætla út í göngutúr með krakkana á eftir. Það er rosalega fallegt veður, sólin skín og það er bara alls ekki mjög kalt, um 10-12 stiga hiti.

Hafið það gott dúllurnar mínar :D

Góður laugardagur ;)

Fékk að sofa svolítið út í morgun, það er alltaf næs. Svo er bara búið að vera leti hér, nema að ég fór nú í ræktina og tók litlu krakkana með. Já og keypti mér svolítið low carb nammi í tilefni helgarinnar ;)

Matarlega er dagurinn á þessa leið:

Morgunmatur: Enginn.
Hádegismatur: 2 sneiðar Lindbergbrauð með L&L, roastbeef og eggjum.
Miðdegisverður: Kjúklingabringa með grísku salati og dressingu úr léttum sýrðum rjóma.
Kvöldverður: Kefir með jarðarberjum og strásætu. 1 sneið Lindbergbrauð með léttsultu og osti.
Millibitar: 28 grömm low carb súkkulaði, 6 low carb karamellur og 1 pk. Fruittella light brjóstsykrar.

Samtals gerir þetta um 1210 kkal. og 29 grömm kolvetni.

Ætla að eiga gott kvöld í kvöld og finna einhverja góða mynd að glápa á. Við horfðum á Gothica í gær og hún var mjög spennandi ;)

Hlakka mikið til að stíga á vigtina á morgun :D

Btw. á einhver uppskrift af kolvetnasnauðri ávaxtaböku? Eitthvað í stíl við eplaböku, en sem maður gæti alveg eins notað jarðarber eða önnur ber í?

Föstudagur og helgin framundan

Og enn svíf ég á bleika skýinu mínu. Reyndar er kaloríumagnið aðeins meira í dag en það hefur verið undanfarið, en samt ekkert til að æsa sig yfir. Ég fór heldur ekki í ræktina eins og ég ætlaði og það voru algjör mistök. Ég nefninlega var svo þreytt þegar ég kom heim úr vinnunni og lagði mig og ætlaði að fara í ræktina klukkan hálfsjö. En svo vaknaði ég ekkert fyrr en klukkan sjö og ræktin lokar klukkan átta á föstudögum. Svo það varð ekkert úr því. En ég dríf mig á morgun í staðin.

Dagurinn var svona:

Morgunmatur: 2 sneiðar Lindbergbrauð með L&L, skinu og eggjum.
Hádegismatur: Ferskt salat með skinkubitum og osti, smá dressing.
Miðdegisverður: Grillaður kjúklingur með grísku salati og dressing úr léttum sýrðum rjóma.
Kvöldsnarl: Kefir með strásætu. 1 sneið Lindbergbrauð með léttsultu og osti.
Millibiti: 2 pk Fruitella light brjóstsykrar (37 grömm hvor) og 1 pk Läkerol cactus.

Samtals var þetta um 1535 kkal. og 31 gramm kolvetni.

Annars hlakka ég bara til að stíga á vigtina á sunnudaginn ;) Ætla að vera voða dugleg þangað til.

Gengur svo vel :D

Mér finnst þetta bara ganga svo rosalega vel núna. Mataræðið allt í góðu skipulagi og ég hef enga sérstaka þörf í neitt annað. Búin að vera svaka dugleg í ræktinni og er bara hæstánægð með mig. Fór reyndar ekki í ræktina í dag, enda svo sem alveg óþarfi að fara á hverjum einasta degi. Hins vegar fór ég með krakkana í friðargöngu áðan með skólanum hennar Elísu, og það var aleg dágott labb. Það er víst dagur sameinuðu þjóðanna skilst mér. Svo ég er búin að fá smá hreyfingu í dag.

Svolítið skondið hvernig það koma svona tímabil þar sem manni gengur svaka vel, er svo jákvæður og finnst þetta ekkert mál. Svo inn á milli koma tímabil þar sem ég varla nenni þessu, er í engu stuði, alltaf að svindla smá og stend mig alls ekki vel. En eins og ég er alltaf að segja, málið er að gefast samt ekki upp. Núna er ég t.d. í svona góðum gír og þá er líka best að nýta það vel ;)

En já, dagurinn er svona:

Morgunmatur: Egg og beikon.
Hádegismatur: 2 sneiðar Lindbergbrauð, önnur með léttsultu og osti, hin með L&L, skinku og eggjum.
Miðdegisverður: Nautstrimlar og grænmeti steikt á pönnu.
Kvöldsnarl: Kefir með strásætu. 1 sneið Lindbergbrauð með léttsultu og osti.
Millibiti: 1 pk Läkerol cactus og 1 pk Läkerol salvi.

Samtals er þetta um 1220 kkal. og 34 grömm kolvetni.

Var á námskeiði í dag, mjög áhugavert. Var fjallað um heimaöndunarvélar og þá sjúklingahópa sem kemur til greina að fái slíka meðferð. Á morgun er svo venjulegr vinnudagur og svo er maður bara kominn í helgarfrí, æði ;)

Ái!

Er með þokkalegar harðsperrur í öllum líkamanum eftir tímann í gær. Fór samt í ræktina í dag, en bara þetta venjulega Orbitrek og tækin. En ég er svo ánægð með þennan Flæði og Jafnvægi tíma, ætla að reyna að fara í hann vikulega. Þetta er eiginlega sambland af jóga, Pilates og svona austrænum "mjúkum" bardagalistum eins og aikido og t'ai chi.

Svo er hér hún Jana komin í átak ;)

Svefn o.fl.

Svei mér þá, mér tókst að fara "snemma" að sofa í gær. Var sofnuð um tvöleytið. Ég er nefninlega alveg ferleg með að sofna ekki fyrr en undir morgun stundum. Enda vaknaði ég nú bara klukkan hálfsjö í morgun og var bara ótrúlega hress. Sonurinn skreið nefninlega upp í og ég vaknaði við það og bara nennti ekki að sofa lengur. Og ég er enn vakandi og ekki að drepast úr þreytu. En svefn er auðvitað mikilvægur fyrir heilsuna. Ég þarf eiginlega meðvitað fara að venja mig á að fara fyrr að sofa á kvöldin (nóttunni) og nýta bara daginn í staðin. Oft er ég nefninlega vakandi til svona 3-4 á nóttunni ef ég er í fríi daginn eftir, því ég tími ekki að fara að sofa strax; finnst svo gott að eiga tíma fyrir mig þegar krakkarnir eru sofnaðir. En þau eru nefninlega oft svo óþekk að fara að sofa og eru kannski ekki sofnuð fyrr en um 22-22:30, þó þau séu komin inn í rúm klukkan 21. Merkileg alveg.

Annars er ég að hugsa um að fara að taka svona trefjar sem eiga að vera svo góðar fyrir meltinguna. Ég keypti svona í vor einhverntíman og ætlaði að reyna að plata í strákpjakkinn, því hann hefur átt við hægðatregðu að stríða. En hann vill sko ekki sjá þetta. Þannig að þessar trefjar hafa bara staðið uppi í skáp, ónotaðar. Svo ég hugsaði með mér að ég get þá alveg eins prófað þetta, getur varla skaðað ;) Ekki að hægðirnar mínar séu í neinu svaka ólagi svo sem ;) Veit reyndar ekkert hvort þetta dótarí innihaldi einhver kolvetni sem hafa áhrif, en það er þá varla mikið svo ég ætla bara að reikna með því eins og þetta séu 100% trefjar.

Ég er búin að plana matseðil dagsins. Svona lítur hann út (er reyndar búin að borða morgun- og hádegismat):

Morgunmatur: 2 sneiðar Lindbergbrauð, önnur með léttsultu og osti, hin með kavíar og eggjum.
Hádegismatur: Kefir (ákveðin gerð af súrmjólk) með jarðarberjum og strásætu. 1 sneið Lindbergbrauð með léttsultu og osti.
Miðdegisverður: Nautastrimlar og grænmeti steikt saman á pönnu.
Köldsnarl: Eggjahræra með skinku og osti.
Millibiti: 1 pk Läkerol cactus og 1 pk Läkerol salvi.

Samtals gerir þetta um 1170 kkal. og 37 grömm kolvetni. Þá er bara að standa við planið ;)

Er jafnvel að hugsa um að drífa mig í ræktina í dag þegar krakkarnir eru búnir í leikskólanum, er bara í svo miklu stuði. Kannski af því að ég fór svo "snemma" að sofa, hahaha ;)

Fleiri í átaki

Þetta er Ofurbollan :D Endilega kíkið á hana.

Þreytt, en samt góð þreyta ;)

Ég var nú bara svo hrikalega dugleg að ég skellti mér í ræktina aftur í kvöld. Það var nú bara vegna þess að vinkona mín dró mig með sér í svokallaðan "flyt og ballanse" tíma, sem á íslensku gæti heitið "flæði og jafnvægi". Þetta minnir kannski aðeins á jóga (hef reyndar aldrei farið í jóga), eru svona teygju- og jafnvægisæfingar, sem líka eru styrktaræfingar. Þetta var nú bara ótrúlega mikið púl, það sko lak af mér svitinn á tímabili. Þó þetta séu allt hægar og mjúkar æfingar, þá tekur það sko á að gera svona hægar teygjur og halda stöðunni o.s.frv. Fór líka á Orbitrekkið í rúmar 20 mínútur í svaka puði áður en tíminn byrjaði. Svo ég held að ég hafi bara brennt vel. Þannig að ég er þokkalega þreytt núna, en svona góð þreyta þar sem ég finn að ég er búin að taka vel á. Var að deyja úr hungri þegar ég kom heim eftir þetta og var að fá mér að borða og líður bara virkilega vel núna ;)

Annars er ég enn að jafna mig eftir næturvaktirnar, er alltaf smá tíma að snúa sólarhringnum við aftur. Vaknaði í morgun til að koma krökkunum í leikskóla og skóla og fékk mér þá morgunmat, en lagði mig svo aftur og svaf til kl.15, þannig að ég borðaði engan hádegismat. Svona var dagurinn hingað til:

Morgunmatur: Egg og beikon.
Hádegismatur: Enginn.
Miðdegisverður: Þurrsteikt hakk með léttsteiktu grænmeti og smá rjómaslettu sem sósu.
Kvöldsnarl: 2 sneiðar Lindbergbrauð með L&L, roastbeef og eggjasneiðum, kryddað með salti og pipar.
Millibiti: 1 pk. Läkerol cactus og 1pk. Läkerol salvi.

Þetta gerir um 1070 kkal. og 22 grömm kolvetni.

Ég er komin með algjört æði fyrir Lindbergbrauði með L&L, roastbeef og eggjum. Krydda smá með salti og pipar ofan á og þetta er bara æði. Prófið bara, skiptir eflaust minnsta máli hvaða brauð er notað, en hugsa að gróft brauð bragðist samt best með þessu ;)

Vigtin er vinkona mín í dag líka, en ég ætla ekkert að setja inn neinar tölur fyrr en á sunnudaginn ;) Best að kíkja bloggrúntinn gellur, og munið nú að kíkja hjá þessum nýju svo þær gefist ekki upp ;)

Smá meira svona í lok dags

Fór í ræktina og líður auðvitað svaka vel eftir það. En annars, í ljósi allra þessaa lýtaagerðaþátta sem eru núna að tröllríða öllu, væruð þið tilbúnar í einhverja svona lýtaaðgerð og þá hvernig og hversvegna? Hvaða líkamshluta eruð þið minnst ánægðar með og hvaða eruð þið mest ánægðar með? Og hvers vegna? Sá líkamhluti sem ég er minnst ánægð með er slappi hengimaginn minn. Svei mér þá ef ég gæti ekki hugsað mér að fara einhverntíman í svona svuntuaðgerð og láta laga hann. En þrátt fyrir það þá ergir hann mig ekkert svo mikið, svo lengi sem ég get bara falið hann í buxunum ;) En sá líkamshluti sem ég er mest ánægð með er líklega mittið mitt. Erfði tímaglasaboddíið frá mömmu og þar með tiltölulega mjótt mitti. Finnst það nefninlega gera mig svo kvenlega, híhí :Þ

Næturvaktirnar búnar í bili

Ooooooooohhhh!!! Ég GLEYMDI nestinu mínu heima þegar ég fór á næturvaktina í gær, buhuhu. Ég meika nú ekki heila næturvakt án þess að borða neitt svo ég fékk mér eina grófa brauðsneið með skinku og eggjasneiðum, og svo var einn matardiskur afgangs frá kvöldmatnum og hann passaði svo sem ágætlega við kolvetnasnauða fæðið mitt: Roastbeef, reyktur lax og kartöflusalat. Kartöflusalatið var auðvitað ekki mjög heppilegt, en það var lítið af því. Þetta skemmdi sem betur fer ekkert mikið. Kolvetnin voru í meira lagi, en kaloríurnar alveg fínar. Heildin gerði um 1200 kkal. og 52 grömm kolvetni. Svo var ég MJÖG ánægð með mig að standast freistingarnar, því okkur var boðið upp á þessa ótrúlega girnilegu súkulaðiköku, og ég fékk mér EKKI NEITT af henni ;) Þannig að ég er bara ánægð með mig í dag ;) Ætla að reyna að druslast í ræktina á eftir, nenni bara ekki að fara strax og nenni ekki að taka krakkana með í þetta skiptið. Það er opið til 22, hugsa að ég reyni bara að fara á milli 19 og 20, jafnvel aðeins seinna.

Vigtunardagur

Jámm, ekki náði ég markmiðinu að vera 80 kg, en var svo sem ekkert allt of langt frá. Þegar ég steig á vigtina blasti við mér talan 80,8, sem er nú skömminni skárri en þessar tölur yfir 81 ;) Það þýðir allavegana að það fóru 1,3 kg þessa vikuna. Vona bara að ég verði komin í 80 kg næsta sunnudag. Ákvað að vera ekkert að færa inn mælingar núna, held að það sé sniðugara að vera bara með þær á ca mánaðarfresti.

Annars finn ég að beinin mín eru að verða sýnilegri og áþreifanlegri. Lá uppi í sófa í morgun og fann hvernig mjaðmabeinin stungust út, hahaha. Mætti halda að ég væri horuð, en ónei, ég er bara með stór mjaðmabein og reyndar líka stór rifbein; þessi efstu stingast svona út líka ;) Svo sé ég alveg móta fyrir viðbeinunum. Þetta er bara gaman. Ég fíla mig sem sagt mjóa í dag, hehe.

Engin líkamsrækt í dag, enda fór ég í gær og finnst það alveg nóg. Síðasta næturvaktin í þessari lotu er svo á eftir. Ég er nú bara svakalega ánægð með hvað ég hef verið dugleg á næturvöktunum og ekki freistast í neitt óhollt. Sko mig bara ;)

En já, best að setja smá skammtímaplan upp, ætla bara að hafa markmiðin mjög temmileg:

Takmark númer 1 er að vera komin í 80 kg þann 24. október, sem sagt næsta sunnudag.
Takmark númer 2 er að vera komin í 75 kg þann 19. desember.

Ég er strax farin að hugsa út í jólin. Síðast þá þyngdist ég um ca 5-7 kg yfir þessar hátíðir. Var síðan mjööööög lengi að koma mér í gang aftur. Svo vitiði nú allar hvernig fór í sumarfríinu mínu. Mig bara langar alveg innilega EKKI að lenda í þessu aftur, en samt vil ég ekki neita mér um góðgæti um jólin. Ég þarf því að plana þetta mjög vel og setja mér fastar skorður. Ekki liggja á beit yfir öll jólin og svo nýárið. Eruð þið eitthvað farnar að spá í þetta? Einhver með góðar hugmyndir? Ég verð reyndar fyrst að fá að vita hvernig ég verð að vinna yfir hátíðirnar áður en ég fer að plana mikið.

Góðan daginn ;)

Þá er maður búinn að sofa. Er komin í leikfimigallann og búin að fá mér fyrstu máltíð dagsins, sem var Lindbergbrauð með áleggi. Ég legg nú ekki í það að rjúka beint í ræktina svona nývöknuð og úldin, en ég ætla að fara eftir svona hálftíma/klukkutíma. Bara jafna mig smá fyrst.

Annars er hér ein enn sem bloggar um átakið sitt. Hún reyndar hefur ekki sér átaksblogg, en skrifar samt um átkakið sitt á sér síðu á blogginu sínu. Eini gallinjn er að það er ekki hægt að kommenta beint undir því sem hún bloggar um átakið. En mér finnst endilega að við eigum að fylgjast með henni og kommenta þá bara í gestabókina, eða bara í dagbókina þó hún sé kannski ekki að skrifa akkurat um átakið þar. Kíkið á hana ;) Hún heitir Guðbjörg.

Er að fara að sofa

Bara skrifa smá áður en ég fer og legg mig eftir næturvaktina. Ætla ekki að skrifa máltíðirnar, það eru engar reglulegar máltíðir þegar maður er á þessum næturvöktum, en heildarsumman var um 1250 kkal. og 40 grömm kolvetni. Svo er vigtunardagur á morgun, ætla bara að halda mig við það system að setja inn vigtina á sunnudögum.

Svo fann ég eina nýja átaksbloggskvísu í viðbót Mudda kallar hún sig og þið finnið síðuna hennar hér.

Næturvaktir

Já, enn og aftur eru það næturvaktir hjá mér. Ætla nú samt að reyna að vera voða dugleg í mataræðinu og ekki láta allt fara í rugl. Tók með mér Lindbergbrauð og grænmeti í gær til að narta í, og það gekk bara mjög vel. Ætla bara að gera það sama í nótt, þ.e. taka með mér nesti. Annars fór ég ekki í ræktina í dag. Svaf auðvitað í allan dag eftir næturvaktina og svo þurfti ég að fara að kaupa regngalla á elstu dótturin og nesti, því hún er að fara í skátaferðalag á morgun (gistir eina nótt). Ég þarf svo að pakka niður fyrir hana og finna svefnpokann og svona, þannig að ræktin varð að bíða núna. Ætla bara að fara á morgun, en þá er eitthvað afmæli hjá stöðinni og einhver smá hátíð hjá þeim. T.d. er krökkunum sem eru í pössuninni boðið upp á ís ;)

Jæja, best að fara að gera eitthvað af viti ;)

Ein ný

Ein í viðbot komin í átaksbloggarana ;) Þetta er hún Eva Huld ;D

Mjakast í rétta átt

Var allavegana undir 82 kg í morgun, en það er svo sem enginn formlegur vigtunardagur í dag. Samt svolítið gott fyrir sálina ;) Annars líður mér bara mjög vel og finnst ég vera á mjög góðu róli. Fór í ræktina í dag og fannst ég bara í fínu formi. Eldaði þennan ljúffenga fiskrétt í kvöldmatinn (var hugsað til ég_get og fiskréttanna hennar), ekki svo sem samkvæmt neinni uppskrift, bara tíndi til það sem ég átti og skáldaði eitthvað. Mjög góður og hollur ;)

Ég var að hugsa um þetta sem Hildur gerir; að skrifa alltaf matseðilinn fyrir daginn. Ég reyndar geri þetta að sumu leyti, því ég skrifa alltaf niður kaloríurnar og kolvetnin yfir daginn og eftir sem líður á daginn þá sé ég hvað ég á mikið eftir. Markmiðið er að vera í kringum 1200-1500 kkal. og 20-40 grömm kolvetni á dag. Ég set þetta bara upp í Excel töflu sem leggur sjálfkrafa saman tölurnar sem komnar eru, þannig að ef ég færi inn allt jafnóðum þá sé ég hvað ég á margar kaloríur eftir upp í 1500 o.s.frv. Er t.d. núna búin að plana kvöldsnarlið sem ég má leyfa mér út frá kaloríu- og kolvetnafjöldanum sem ég er komin upp í á þessari stundu. En ég ætla bara að skrifa allan daginn hér á bloggið mitt, líka það sem ég hef planað, þannig að það sjáist hver heildarniðurstaðan verður.

Morgunmatur: Egg og beikon.
Hádegismatur: Brokkolí- og skinkugratín m. fersku salati.
Kvöldmatur: Ofnbakaður fiskiréttur með grænmeti.
Millibitar: 1 pk. Läkerol cactus, 2 stórir bollar kaffi með mjólk, 100 grömm baby gulrætur með ídýfu gerðri úr léttum sýrðum rjóma, 25 grömm low carb lakrís.

Í heildina gerir þetta um 1400 kkal. og 28,5 grömm kolvetni.

Á morgun ætla ég að reyna að komast í heimsókn til Karinar vinkonu og skoða litla stóra strákinn hennar. Hann fæddist 3 október og var nú svo sem ekkert voða lítill, eða 16 1/2 mörk og 51 cm ;) Nú hringlar sko í eggjastokkunum mínum.

Þessar kvöldvaktir sko :S

Jebb, brjálað að gera eins og venjulega. Stundum fæ ég alveg upp í kok sko af þessu álagi sem er á okkur. Mér líkar vel að hafa mikið að gera, en ekki svo mikið að ég nái ekki neinni yfirsýn og finnist ég ekki hafa stjórn á hlutunum.

Well, well, svona var dagurinn matarlega séð:

Morgunmatur: 2 Lindbergbrauðsneiðar með osti og léttsultu annars vegar, og smurosti og skinku hins vegar.
Hádegismatur: Enginn.
Miðdegisverður: Hvalkjöt með soðnu rósakáli og brúnni sósu.
Kvöldsnarl: 2 Lindbergbrauðsneiðar með osti og léttsultu annars vegar, og smurosti og skinku hins vegar.
Millibiti: 8 low carb karamellur, ca 30 grömm low carb súkkulaði, 150 grömm Baby gulrætur með ídýfu gerðri úr léttum sýrðum rjóma, 1 Läkerol salvi.

Þetta gerði um 1100 kkal. og 41 gramm kolvetni.

Fór ekki í ræktina í dag, var bara allt of þreytt. Sofnaði svo seint í gær og þar sem ég var að fara á kvöldvakt ákvað ég að leggja mig bara frekar eftir að ég var búin að græja krakkana í leikskólann og fá mér morgunmat. Þess vegna borðaði ég heldur engan hádegismat (nema karamellur og súkkulaði kallist hádegismatur :Þ)

Samstilltar þjáningasystur ;)

Var að fara bloggrúntinn og þetta er nú bara fyndið. Við erum nær allar búnar að liggja í einhverjum veikindum, nær allar búnar að vera að sukka út af því eða öðru, og nær allar komnar með ógeði á sukkinu og komnar fílelfdar aftur til leiks í átakinu ;) Ætli við séum nær allar á túr á sama tíma líka?

Ljóta vigt >:(

Ég þarf að velja mér einhverja daga til að setja inn vigtartölurnar mínar hér. Þó svo að ég fari á vigtina á hverjum degi þá fannst mér betra að setja það svona inn vikulega eins og ég gerði í átakinu mínu fyrir sumarfrí. Ætli ég haldi mig ekki bara við sunnudagana. Þá hef ég svona vikulegt yfirlit hér. En ég verð bara að telja mér trú um að fitan mín sé að umbreytast í vöðva :Þ Fór reyndar ekki í ræktina í dag, þar sem ég fór í gær. Ég ætla að hafa það að stefnu að fara ca annan hvern dag, eða 3-4 sinnum í viku, helst 4 sinnum.

Matarlega var dagurinn svona:

Morgunmatur: Síðasta low carb pizzusneiðin ;)
Hádegismatur: Egg og beikon. 1 msk. kókosolía.
Miðdegisverður: Grillaður kjúklingur með grísku salati.
Kvöldsnarl: 1 sneið Lindbergbrauð með osti og léttsultu.
Millibitar: 6 low carb karamellur og 25 gr low carb lakkrís.

Ég ætla hér eftir bara að skrifa aðalmáltíðirnar og hafa svo eina línu fyrir alla millibita og nart, sama hvenær dagsins það er. Er reyndar ekki enn búin að fá mér kvöldsnarl og low carb lakkrísinn, en það er á planinu. Þetta gerir um 1400 kkal. og 16 grömm kolvetni.

Ég er nú ekki bjartsýn á að ná að komast í 80 kg fyrir næsta sunnudag. Nú virðist ég bara standa í stað í 82 kg. Fáránlega stutt í þetta samt og svolítið ergilegt að vigtin virðist ekkert hreyfast. En það hlýtur að koma. Alltaf að vera bjartsýn. Það hefur komið mér hingað þar sem ég er. Þó svo að mig hafi nú oft langað til að gefast upp þá hef ég ekki gert það. Það eru allavegana 35 kg farin síðan ég byrjaði í átakinu mínu í janúar 2003, og það skulu fara a.m.k. 10 í viðbót ;)

Pizzan er að verða búin ;)

Ekki hafa áhyggjur, pizzan er að klárast sko, svo matseðillinn verður ekki endalaus pizza ;) Á bara eina sneið eftir, hehehe.

Morgunmatur: Enginn.
Hádegismatur: Low carb pizza.
Miðdegisverður: Svínahnakki með léttsteiktu grænmeti.
Kvöldsnarl: 2 Fiber+ hrökkbrauðssneiðar með L&L og skinku, og léttsultu og osti.
Nart: Low carb súkkulaði og 1 pk. Läkerol salvi.

Samtals er þetta um 1250 kkal. og 31,5 grömm kolvetni.

Ég fór í ræktina í dag og er bara mjög ánægð með það. Maður er orðinn eitthvað svo heimavanur þarna, farinn að heilsa fólki og fólk farið að heilsa manni af fyrra bragði, híhí, fyndið bara ;)

Hmm!

Merkileg þessi vigt. Nú var ég 82,1 kg þegar ég steig á hana áðan og samt er ég búin að vera bara ansi dugleg. Mældi svo ummálið og það hefur nú bara minnkað ef eitthvað er. Allavegana er ég mjög svipuð núna og ég var rétt fyrir sumarfrí.

Brjóst:..............101 cm (102)
Mitti:.................76 cm (76)
Magi.................98 cm (99)
Mjaðmir:............96 cm (98)
Upphandleggur:..32 cm (32)
Læri:..................61 cm (61)
Kálfi:..................38,5 cm (39)

Jájá, ég get svo sem alveg sætt mig við þetta, vil bara að þessi vigt fari niður líka, ekki upp :S

Vaknaði seint svo ég át eina low carb pizzusneið sem svona brunch ;) Ætla svo að reyna að fara í ræktina á eftir þegar formúlan er búin. Get nefninlega ekki tekið með mér krakkana í dag og formúlan er heilög fyrir kallinum, svo ég ætla ekki að láta hann þurfa að vera einan með krakkana rétt á meðan formúlan er, hahaha. Hún er sko ekki sýnd beint hér (glataðir Norðmenn) heldur klukkan 14 í dag.

Matseðill dagsins

Svona var hann nú:

Morgunmatur: Enginn.
Hádegismatur: Low carb pizza.
Miðdegisverður: Low carb pizza.
Kvöldsnarl: Eggjahræra með grænmeti.
Nart: 1 pk. Läkerol og low carb súkkulaði.

Gerði í heildina um 1260 kkal. og 24 grömm kolvetni. Mig langar alveg svakalega í bjór núna, en bara tími ekki að fara að skemma allt erfiðið upp á nýtt. Svo það verður að bíða betri tíma og betri ástæðu.

Notalegur dagur ;)

Í dag er pizza aðallega á matseðlinum, hehehe. En ég ætla nú reyndar að gera eggjaköku í kvöldmat ;) Mér finnst allt vera á góðri leið núna, veit svo sem ekki hvort ég næ markmiðinu að vera komin í 80 kg fyrir 17 okt, en við sjáum til ;)

Hey, Hildur er komin aftur og farin að blogga opinberlega á nýtt. Æðislegt bara! Gott hjá henni að koma svona aftur, sýnir hvað hún er sterk ;)

Ég kem líklega aftur seinna í kvöld og færi inn það sem ég hef borðað og kíki svo rúntinn ;)

Pizzudagur ;)

Þetta er nú meiri notalegheitadagurinn. Ákvað að elda mér low carb pizzu í kvöld og spara kaloríur og kolvetni dagsins þangað til. Fékk mér bara próteinstöng í morgunmat og svo lagði ég mig bara og svaf í allan dag. Letinginn sko. Borðaði því engan hádegismat. Skrapp svo í ræktina þegar ég var búin að sækja krakkana á leikskólann (já, fór loksins í ræktina) og eldaði síðan pizzuna þegar ég kom heim, venjulega pizzu fyrir hina ;) Ætla svo að fá mér eitthvað gúmolaði í kvöld, er ekki búin að ákveða hvað, en ég á m.a. low carb súkkulaði og Läkerol. Ætla ekki að skrifa máltíðirnar, enda voru þær varla neinar, haha, bara pizza núna áðan ;)

Á morgun segir sá lati

Jebb, ég fór ekki í ræktina í dag og ætla bara á morgun. Ekkert annað en leti í mér, hef nákvæmlega enga afsökun aðra en þá að ég hreinlega nennti ekki.

Annars var ég nú að fatta að ég er búin að léttast um það sem samsvarar rúmlega einni Elísu Auði, þ.e. elstu dóttur minni. Það er nú slatti sko. Ég á nú ekkert auðvelt með að lyfta henni upp, og þessa þyngd var maður að burðast með utan á sér. Ótrúlegt.

Fékk smá nammiútrás í dag og át fullt af low carb nammi, með tilheyrandi gasmyndun og drunum í búknum á mér. Svona var dagurinn:

Morgunmatur: Egg og beikon. 1 msk. kókosolía.
Hádegismatur: Enginn.
Miðdegisverður: Steikt kjúklingabringa með grænmetisgratín.
Kvöldsnarl: 2 low carb brauðsneiðar með osti og léttsultu.
Nart: Low carb súkkulaði, karamellur og lakkrís.

Þetta gerir um 1600 kkal. og 16 grömm kolvetni.

Annars var ég voða ánægð með vigtina mína í morgun, var komin niður í 81,4 kg :D

Brjóstahaldarar

Stelpur hafið þið eitthvað vit á brjóstahöldurum? Ég kann sko ekkert á þá. Einhverntíman notaði ég víst 80 B, en ég man nú ekki einu sinni hvenær það var. Allavegana verrí long tæm agó. Ég hef bara eiginlega aldrei pælt í þessu. Svo hef ég bara svo mikið verið með gjafabrjóstahaldara, notað þá á meðgöngunni og við brjóstagjöfina og líka alveg löngu eftir að ég var hætt með börnin á brjósti (svo kom næsta, haha). En ég man líka að þegar ég keypti mér brjóstahaldara þegar ég var ólétt af Hjalta (yngsta barnið) þá var ég allavegana í E skálum. Og þá haldara notaði ég leeeeeeengi, bara alveg þangað til ég fór að grennast.

Eftir það tók ég í notkun gamla brjóstahaldara sem pössuðu víst einhverntíman á mig áður, veit ekkert stærðina, en allavegana minna en E skálar. Svo kom að því að þeir haldarar urðu of stórir og ég gerðist svo djörf að kaupa á mig tvenn svaka flott nærfatasett, og haldararnir voru í stærð 85 D. Svaka pæja sko.

Nema hvað að þessir haldarar eru svo mikli pæjuhaldarar að þeir eru ekkert allt of þægilegir að vera í allan daginn í vinnunni. Hinir brjóstahaldararnir mínir orðnir allt of stórir og eiginlega bara hættir að vera haldarar, sem sagt gera ekkert gagn. Svo ég fór einhverntíman í byrjun sumars og splæsti á mig þessum fína venjulega bómullarbrjóstahaldara (hvítur, með blúndum samt sko) og hann var í stærð 85 C. Passaði mjög vel ef ég bara notaði ystu krækjurnar.

Síðan ákveð ég í dag að ég ætti kannski að splæsa á mig einum enn brjóstahaldara sem ég gæti gengið í dagsdaglega. Fann þá þetta hrikalega flotta bláa sett og féll fyrir því. Mátaði brjóstahaldara í 80 C og hann passaði svo sem alveg, nema að mér fannst brjóstin aðeins of stór í skálarnar. Mátaði þá 85 C og skálarnar þar smellpössuðu, en ég nota ekki lengur ystu krækjurnar, heldur miðkrækjurnar. Mátaði fleiri gerðir af brjóstahöldurum líka og alltaf var þetta svona. 80 C skálarnar alveg á mörkunum, en 85 C skálarnar smellpössuðu.

Ég hélt bara að að C skálar væru alltaf C skálar, sama hvert ummálið væri. Weird. En jájá, ég er samt svaka beib í nýju bláu nærfötunum mínum :Þ

Keypti mér reyndar líka tvennar nærbuxur líka, bara plein hvítar... en með blúndum samt :Þ Átti orðið bara tvennar svona venjulegar naríur sem ekki héngu utan á mér (svo á ég þrennar G-string sem ég nota bara spari spari þegar ég vil ekki að sjáist eitthvað nærbuxnafar, þoli eiginlega ekki eitthvað svona band að skerast upp í rassinn á mér).

En já, snúum okkur þá að öðru. Þetta borðaði ég í dag:

Morgunmatur: Tvær low carb brauðsneiðar með osti og léttsultu.
Nart: 1 pk. Läkerol cactus.
Hádegismatur: Eggjahræra með reyktum laxi og grænmeti.
Miðdegisverður: Nautakjöt með grænmetisgratín.
Kvöldnart: Niðurskorið grænmeti með ídýfu gerðri úr léttum sýrðum rjóma. 1 pk. Läkerol salvi.

Þetta gerði svo mikið sem um 1440 kkal. og 35 grömm kolvetni. Fór ekki í ræktina í dag. Er enn ekki alveg komin með heilsuna 100%. En ég verð eiginlega að drífa mig á morgun og taka þá bara ekkert of stífa æfingu. Mér er hreinlega farið að líða illa að vera í þessu hreyfingarleysi.

Jæja, best að fara bloggrúntinn og svo bara slappa af fyrir framan imbann ;)

Skipulag á ný

Jámm, það er víst best að skrifa inn hvað maður lætur ofan í sig, virkar einhvernvegin best þannig.

Morgunmatur: Low carb brauð, 2 sneiðar, með osti og léttsultu (sykurlaus).
Hádegismatur: Low carb samloka með osti og salami.
Miðdegisverður: Kjúklingabringur og grænmeti steikt á pönnu.
Kvöldsnarl: Soyjapönnukaka á la Gerrit, með rækjum, salati og cultura-dressing.
Nart: 2 BabyBel ostar og 1 pk. Läkerol cactus.

Gerði um 1200 kkal. og 30 grömm kolvetni.

Ég er bara þreytt og ætla að halla mér fljótlega. Ætla að druslast í vinnuna á morgun.

Vigtin niður og skapið upp ;)

Amm, komin í 81,9 kg aftur :D Enn lasin, en mun léttari í skapinu :D

Mánudagur

Ég stóðst brauðbollurnar í gær, en í staðin stalst ég í smá sælgæti hjá krökkunum... ekkert skárra það :S En það er kominn nýr dagur og bara best að koma sér í gírinn. Verður reyndar engin líkamsrækt í dag þar sem ég er bara orðin lasin aftur :(

Bakstur, bakstur, bakstur!

Tók upp á því að baka með krökkunum... eða reyndar bara með Örnu, því Elísa er orðin lasin og Hjalti var svo þreyttur að hann varð að leggja sig smá. En núna eru alveg ilmandi nýjar og heitar brauðbollur inni í eldhúsi og ég er í mestu vandræðum með að hemja mig. Er reyndar líka að hefa low carb brauðdeig, en það er langt þangað til það verður tilbúið. Ó hvað mig langar í heita og ilmandi brauðbollu með smjöri og osti. Púff, best að finna sér eitthvað sem ég má borða.

Weirdo dagur

Borðaði ekki neitt fyrr en um 16:30. Þá fór ég í bíó með elstu stelpunni minni og fékk mér eitt lítið dökkt hnetusúkkulaðistykki og 1 pakka Läkerol cactus. Svo borðaði ég kjúkling og grænmeti í kvöldmat og var svo að narta í smá kolvetnansnautt súkkulaði. Glæsilegur dagur, eða hittó :þ Komin upp í næstum því 800 kkal. og um 27,5 grömm kolvetni. Fór ekkert í ræktina þar sem ég fór bara í bíó í staðin. Held ég taki bara frí um helgina og fari í ræktina á mánudaginn. Núna ætla ég að hlamma mér í sófann og glápa á einhverja mynd, slappa bara af og hafa það næs.

Hjálpi mér!!!

Vigtin gjörsamlega öskraði á mig í morgun: Þú ert 83,7 kg helvítis feita beljan þín. Jább, þetta er það sem hún sagði við mig, ljóta dónalega vigt. Ég sagði henni nú bara að enginn skyldi tala svona dónalega við mig, og hana nú! Er nú reyndar bara enn södd eftir sukk næturinnar, og þar að auki með túrverki og allt sem því fylgir. Svaka fjör. Ætla að reyna að koma mér í ræktina á eftir, en ætla samt fyrst að reyna að ná mér í smá kríu. Er sko núna að leyfa kallinum að sofa út, fæ svo hann til að leyfa mér að leggja mig á eftir ;)

Mataræðið er ekkert planað í dag, hef allavegana ekki lyst á neinum morgunmat þar sem ég er bara enn södd. Enda þegar maður er étandi klukkan þrjú um nóttina og vaknar klukkan átta, þá er kannski ekkert skrýtið að maður sé ekki glorsoltinn :Þ

Öhömm.

Já, ég sem ætlaði ekki að svindla neitt, hah. Gerðist sko stórsvindlari með meiru. Fékk mér 4 bjóra, jarðhnetur og pistasíuhnetur og fullt af snakki. Ef þetta er ekki svindl þá veit ég ekki hvað. Nenni samt ekki að hafa samviskubit, fannst bara virkilega gott að fá mér bjór og meððí ;) Þá er bara að hysja upp um sig buxurnar og taka sig saman og halda áfram í hollustunni.

Hæ dúllur :D

Jájá, ég er hér. Orðin nokkurnvegin frísk aftur. Var á næturvakt í nótt (týpískt að vera veik alla frídagana og vera svo nógu hress til að mæta í vinnu aftur) og rútínan að komast í lag aftur. Helvítis vigtin heldur sig samt fast við að vera um og yfir 82,5 kg, skil hana bara ekki því ég hef ekkert verið að sukka. En svona er þetta, maður verður víst að sætta sig við þessa stæla í henni stundum. Hef ekkert farið að æfa þessa vikuna og nenni ekki í dag. Er nývöknuð og enn með smá kverkaskít. En ég ætla að drífa mig á morgun, er í fríi alla helgina ;)

Nenni ekki að skrifa máltíðir dagsins, enda fara þær allar úr skorðum þar sem ég svaf auðvitað í allan dag. En það verður ekkert óhollt, ég lofa ;)