Ónei, krembollur!!!

Minn helsti veikleiki, hahaha. Elsku karlinn minn var svo "góður" að hann keypti krembollur áðan. Ég var ekki lengi að spæna upp 4 stk. Núna eru 6 eftir í pakkanum og mig dauðlangar að éta þær allar, en ætla ekki að gera það. Úff, þetta er erfitt, hehehe.

Annars bara ágætur dagur. Svaf náttúrulega frameftir eftir næturvaktina og byrjaði svo á því að fá mér 2 sneiðar af low carb pizzu sem ég bjó til í gær. Er núna að gæða mér á rækjum sem ég var að sjóða. Keypti svona heilar rækjur sem ég þarf að dunda mér við að pilla ;) Voða góðar með smá jógúrtdressingu ;) Veit ekki alveg hvað það er mikið sem ég ét því skelin er svo stór hluti af þessu. Þarf að vigta ruslið á eftir og draga það frá heildarþyngdinni, hehe. En ég held ég sleppi nokkuð vel þrátt fyrir krembollurnar ;) Set kannski inn matseðilinn á eftir... ef ég nenni :Þ

Annars ætlaði ég að vera voða dugleg að gera Pilates æfingar á eftir. En ég ætla bara að sjá til. Er frekar tuskuleg og þreytt eftir þessa næturvaktatörn. Svo fór ég líka í ræktina í gær, þannig að það er svo sem í lagi þó ég slappi af í kvöld ;)

Ætla að kíkja á ykkur dúllurnar mínar ;)

Nammidagur í gær

Já, svei bara. Fékk mér pylsu í brauði, ís, skúffuköku og súkkulaði. Enda var vigtin eftir því í morgun. Var búin að sjá tölu upp á 71,1 í gær, en áðan var hún 71,9. Ekki mikið við því að gera ;) Er svo sem ekkert að stressa mig yfir þessu, fannst í raun bara voða næs að fá mér þetta góðgæti, en ætla mér nú ekki að fara að éta svona daglega ;)

Ætla að reyna að druslast í ræktina á eftir. Svo er síðasta næturvaktin í nótt svo að á morgun fer ég að skrifa inn matseðilinn aftur ;) Hef vonandi tíma til að fara bloggrúnt á eftir.

Takk fyrir hrósið og sætu kommentin. Ég veit að ég er að farast úr monti þessa dagana, hehehe, en ég hlýt að mega það hér á átakssíðunni minni ;)

Nýju fötin keisarans ;)

Gella í PILSI!!! 

Í nýjum fötum ;) 

Pilates púl

Fór eftir Accelerated body sculpting prógramminu áðan (hef bara prófað 20 minutes work out prógrammið) og það var sko PÚL!!! 50 mínútna prógramm og margar æfingarnar voru bara verulega erfiðar. Sumar meira að segja sem ég gat ekki gert almennilega. En það kemur eflaust af því að ég geti það einhverntíman ;) En já, ég var sko SVEITT eftir þetta... og það er sko flott ;)

Var á næturvakt

Já, er nývöknuð, var á næturvakt s.l. nótt. Fer aftur í nótt og svo um helgina. Slepp reyndar við aðfaranótt laugardagsins þar sem ég vann hana í raun í nótt (skipti við eina sem þurfti að fá frí). Nenni þess vegna ekki að skrifa inn mataræðið, en það var svo sem ekkert svindl, borðaði bara svolítið mikið ;) Vigtin var samt nokkuð góð við mig áðan, en ég set ekki inn tölu fyrr en á sunnudaginn. Kannski verður vigtin ekkert góð við mig þá, hahaha.

Hef annars lítið að segja. Bjóst ekki við að fara á næturvakt í nótt aftur svo ég veit ekki hvort ég kemst yfir bloggrúntinn, en ég reyni ;) Ég var nefninlega plötuð til að taka aukavakt. Já já, það er alltaf gott að fá smá aukapening ;)

Sorry stelpur :S

Ég bara hef ekki tíma til að fara bloggrúntinn og kemst líklega ekki í það fyrr en á fimmtudaginn í fyrsta lagi. Þetta er aðalega vegna þess að blog.central kerfið er orðið svo svakalega slow og leiðinlegt að ég er heila eilífð að opna þessar síður og síðan opna kommentaboxið, og svo að senda kommentið. Oftar en einu sinni kemur upp villa á síðunni og ég þarf að gera allt aftur. Ég bara kemst ekki yfir ykkur allar núna. Á morgun er ég á morgunvakt, svo á fundi og svo á næturvakt svo ég stórefast um að ég komist í það þá :( Finnst þetta rosalega leiðinlegt og þið verðið bara allar að fá stórt knús frá mér og ástarþakkir fyrir öll sætu kommentin. Skal kommenta hjá ykkur um leið og ég fæ tíma sko ;)

Sentimetrarnir mínir og dagurinn

Jámm, hér eru tölurnar, sem sagt sentimetrarnir ;)

Dagsetning:----10.jan.03-----05.des.04----25.jan.05

Brjóst:-----------129------------97-----------95
Mitti:------------108------------74-----------72,5
Magi:-------------129------------93-----------87
Mjaðmir:----------127------------93-----------91
Upphandleggur:-----41------------30-----------29,5
Læri:--------------76------------58-----------57
Kálfi:-------------45------------38-----------37,5

Samtals farið er þá:

Brjóst:-----------34
Mitti:------------35,5
Magi:-------------42
Mjaðmir:----------36
Upphandleggur:----11,5
Læri:-------------19
Kálfi:------------7,5

Annars er ég bara ánægð með daginn. Hitaeiningarnar urðu kannski aðeins of margar, en ég er líka eiginlega bara búin að ákveða að slaka svolítið á og vera ekki í eins stífri megrun. Ætla samt að reyna að halda mig í um og undir 1500 kkal. Svo ætla ég að leggja aðaláhersluna núna á að móta vöðvana svolítið og nota þá m.a. Pilates æfingarnar mínar til þess ;) Ég fór reyndar í ræktina í dag í aerobic tíma. Þetta var Aerobic 1 og ég finn að það er eiginlega of létt fyrir mig. Ætla að prófa Aerobic 2 næst. Matarlega séð var dagurinn svona:

Morgunmatur: 2 sneiðar Lindbergbrauð með L&L, skinku og eggjum. 125 mL léttjógúrt með ananas.
Hádegismatur: Þríhyrningur (einhverskonar rúnnstykki, mjög gróft og svaka gott) með létta, skinku, osti, tómatsneiðum og eggjum.
Miðdegisverður: Kjúklingabringa steikt á pönnu ásamt wok grænmeti, smá sósa gerð úr Crémefine.
Kvöldsnarl: 2 sneiðar Lindbergbrauð með L&L, roastbeef og eggjum annars vegar, og kjúklingasalati hins vegar.
Millibiti: 1 kaffibolli með mjólk, 2 Atkinssúkkulaði, 1 pk. Läkerol salvi.

Samtals var þetta um 1530 kkal. og 67 grömm kolvetni.

Vitiði, mér finnst alveg GEGGJAÐ að geta leyft mér að slaka aðeins á í mataræðinu. Nú þarf ég líka smám saman að finna rétta jafnvægið í þessu til að halda þyngdinni og þá held ég að það sé ágætt að trappa sig svona upp. Það gerir ekkert til þótt þessi kíló sem ég ætla að missa í viðbót fari aðeins hægar en hin ;)

Komin heim ;)

Ó takk stelpur fyrir yndislegu kommentin ykkar. Það er svo gott að fá þau. Málið er nefninlega að þessi yndislegu komment, ásamt árangrinum sem maður sjálfur sér, er eldsneytið manns; það sem kemur manni áfram. Ójá, það er svo satt!

Gerrit spurði afhverju ég segði að þið fenguð sjokk ef þið sæuð mig án fata, hehe. Tók svo sem bara svona til orða, en ástarhöldurnar, hengimaginn, innanlæraskvapið og bakfellingarnar eru alveg til staðar þarna undir fötunum ;)

SúperS vildi vita sentimetrana ;) Ég skal bara reyna að muna að mæla mig á morgun og skella svo inn öllu saman. En fatastærðin. Ég var í svona 52, og núna kemst ég yfirleitt í 40 :D

Og já, ég hef lent í að fólk sem hafði ekki séð mig lengi þekkti mig ekki, hahaha, það var svolítið fyndið ;)

En dagurinn í dag var á þessa leið:

Morgunmatur: 2 sneiðar Lindbergbrauð, önnur með kjúklingasalati, hin með L&L, skinku og léttosti. 125 mL léttjógúrt með mangó.
Hádegismatur: Salat með skinkubitum, ólívum, fetaosti og ristuðum furuhnetum, smá dressing.
Miðdegisverður: Soðinn þorskur með smá hvítri sósu, 1 pínulítil kartafla og smá soðnar gulrætur.
Kvöldsnarl: Samloka úr Lindbergbrauði með pitsusósu og osti, hituð í örbylgjuofni. 125 mL léttjógúrt með hindberjum.
Millibiti: 1 bolli kaffi með mjólk, 2 Atkinssúkkulaði, 1 sneið Lindbergbrauð með kjúklingakæfu.

Mér fannst ég nokkuð dugleg í kvöld. Það var boðið upp á pizzu í vinnunni, en ég bjó mér bara til gervipizzu með Lindbergbrauðinu mínu, hehe. Svo var ég reyndar voða svöng þegar ég kom heim úr vinnunni og fékk mér þá þessa einu sneið með kjúklingakæfunni. Samtals gerði þetta um 1400 kkal. og 70 grömm kolvetni.

Engin líkamsrækt í dag reyndar, nema þá bara 20 mínútna göngutúr heim úr vinnunni ;)

Jæja, ætla að kíkja smá bloggrúnt og sjá hvað ég kemst langt. Þarf nefninlega bráðum að fara að sofa; morgunvakt í fyrramálið sko ;)

Mynd handa ykkur

Svona er ég í dag ;) 


Kallinn var að taka þessa áðan, er reyndar pínulítið mygluð á henni ;) En þið sjáið mig náttúrulega ekki án fata, hehehe. Þá fenguð þið sjokk :Þ

Jæja, er að fara að vinna á eftir, kem aftur í kvöld og kíki á ykkur.

Dagur að kveldi kominn

Afmælisveislan gekk rosalega vel og afmælisbarnið var alsælt með kökurnar sínar ;) Og auðvitað bara alla veisluna og gjafirnar. Þetta var bara afskaplega skemmtilegt. Ég stóð mig bara nokkuð vel og át bara tvo low carb muffinsa, ásamt svo reyndar tveimur litlum súkkulaðimolum. Í heildina var dagurinn svona:

Morgunmatur: 2 sneiðar Lindbergbrauð, önnur með kjúklingasalati, hin með L&L, skinku og léttosti. 125 mL léttjógúrt með jarðarberjum.
Afmælisveisla: 2 low carb muffins, 2 litlir súkkulaðimolar, ca 2 litlir bollar kaffi með rjóma.
Miðdegisverður: Kjúklinga-sveppasúpa, 1 sneið Lindbergbrauð með L&L, roastbeef og eggjum.
Kvöldsnarl: 150 mL Kefir með strásætu, ásamt hálfum niðurskornum banana og hálfu niðurskornu epli. 1 sneið Fiber+ hrökkbrauð með L&L og léttosti.
Millibiti: 110 grömm bland í poka (low carb hlaup og low carb lakkrís).

Samtals var þetta um 1515 kkal. og 80 grömm kolvetni. Svolítið drjúgur dagur, en ég ákvað að leyfa mér smá low carb gúmolaði þegar allir hinir voru að hakka í sig súkkulaði og annað sælgæti yfir Idol (sem var í kvöld). Ætla svo að skella Pilates í dvd spilarann á eftir og taka eina syrpu ;)

En já, það var þetta með nýtt markmið. Ég er búin að vera að hugsa þetta svolítið. Ég miða eiginlega pínulítið við að spikfellingarbar á bakinu hverfi... þessar sem koma svona undir rifjabogunum ef þið vitið hvað ég meina. Svo nú ætla ég bara að taka þetta í litlum skömmtum. Til að byrja með ætla ég að stefna á 69 kg. Það eru 3 kg í viðbót og þá er ég komin undir 70 kíló, sem er nú svolítið skemmtilegt ;) Alltaf gaman að vera rétt undir tug heldur en rétt yfir ;)

Haba haba sko, þetta er nú frekar mikið gaman og takk fyrir öll frábæru kommentin og hamingjuóskirnar :D Ætla að fara einn bloggrúnt ;)

Vigtunardagur í dag og jibbí og húrra og húrra og jibbí og vá og jíha ;D;D;D;D;D;D

72 kíló!!!!!!!!

Og þar með er markmiðinu mínu náð ;D Gæti ekki verið ánægðari. 3,1 kg fóru þessa vikuna, greinilega einhver sukkkíló sem fóru :D. Jæja, ætla að fara að taka til og gera klárt fyrir afmælisveislu. Skrifa meira í kvöld og kíki á ykkur í leiðinni. Nú þarf ég að fara að pæla í hvernig nýja markmiðið mitt á að vera ;)

Þegar afmæliskökur bakast... lalala :D

Já ég er sko búin að standa í stórræðum. Búin að baka afmæliskökur og það sem meira er, skreyta þær líka ;) Ég er bara nokkuð stolt af árangrinum, þó svo að Þyrnirós sé með svolítið stórt nef og maskarinn hennar sé aðeins farinn að leka :Þ Þið getið séð myndir af listaverkunum hér og hér. Já, ég er allavegana viss um að hún Arna Valdís verður ánægð með þetta :D.

Annars stóð ég mig ágætlega í átakinu í dag. Eina svindlið mitt var þegar ég var að smakka til kremið og hreinsa það smá af puttunum :Þ, og reyndar smakkaði ég örlítinn bita af kökunni, bara til að sjá hvernig hefði til tekist. En það var bara ogguponsubiti. Svo bakaði ég low carb muffinsa fyrir mig ;) Svona var dagurinn:

Morgunmatur: 2 sneiðar Lindbergbrauð, önnur með kjúklingasalati, hin með kjúklingakæfu. 125 mL léttjógúrt með mangó.
Hádegismatur: 2 sneiðar Lindbergbrauð með L&L, roastbeef og eggjum.
Miðdegisverður: 2 kjötbollur í brúnni sósu ásamt léttsteiktu wok grænmeti.
Kvöldsnarl: 3 low carb muffins.
Millibiti: 1 Atkins súkkulaði, 1 pk. Läkerol salvi, smá kökumunnbiti og eitthvað smá kökukremsleik ;)

Samtals reikna ég með að þetta hafi gert ca 1490 kkal. og 75 grömm kolvetni. Jámm, svona frekar mikið af kaloríum, en sleppur svo sem. Reiknaði reyndar svolítið ríflega af kökukreminu, en það er þá bara bónus ef þetta hefur svo reynst minna ;)

Já, og mér tókst meira að segja að fara í ræktina í dag og taka góða æfingu. Kallinn kom líka ;)

Jæja, á morgun er vigtunardagur og svo afmælisveisla ;) Nóg að gera sko. hef ekki tíma til að fara bloggrúntinn núna en geri það einhverntíman á morgun þegar allt er komið í ró ;)

Föstudagur og frí ;)

Mér finnst föstudagar svo æðislegir, þegar ég á fríhelgi ;) Ég ætlaði nú eiginlega í pallatíma í dag en ruglaði tímasetningunni og hélt að tíminn byrjaði kl. 18:00, en hann byrjaði kl. 16:30. Ég ákvað svo bara að sleppa þessu núna, enda var nóg að gera hjá mér að versla inn fyrir afmælið hennar Örnu á sunnudaginn. Kannski leggst á stofugólfið á eftir og skelli Pilates disknum í DVD tækið í staðin... þegar krakkarnir eru sofnaðir ;) Verð nú að prófa þetta sko ;D

En matseðill dagsins er svona:

Morgunmatur: 2 sneiðar Lindbergbrauð með L&L, roastbeef og eggjum, 125 mL léttjógúrt með jarðarberjum.
Hádegismatur: Salat með furuhnetum, ólívum og skinku, smá dressing.
Miðdegisverður: Brokkolí-ostasúpa með skinkubitum, 1 sneið Lindbergbrauð með L&L, skinku og léttosti.
Kvöldsnarl: Skyr með Crémefine og strásætu ásamt 1/2 niðurskornu epli.
Millibiti: 2 Atkinssúkkulaði.

Samtals gerir þetta u.þ.b. 1350 kkal. og 60 grömm kolvetni.

Jæja, ég ætla að sinna krökkunum aðeins, kíki bloggrúntinn seinna í kvöld ;)

Það er svo gaman þegar vel gengur ;)

Enn einn góður dagur í dag ;) Fékk mér reyndar pylsu í brauði í hádeginu, en passaði bara annað betur í staðin. Það er nefninlega alveg hægt að hliðra smá til fyrir svona "óhollustu" ef maður skipuleggur sig smá og hugsar aðeins fram í tímann. Svona var matseðillinn:

Morgunmatur: 2 sneiðar Lindbergbrauð með L&L, roastbeef og eggjum, 125 mL léttjógúrt með mangó.
Hádegismatur: Osta/beikonpylsa í brauði með smá tómatsósu og sinnepi.
Miðdegisverður: Grískt salat (sem sagt með rauðlauk, fetaosti, ólívum og svo líka ristuðum furuhnetum) með kjúklingabringum og smá dressing með.
Kvöldsnarl: Skyr með Crémefine og strásætu ásamt 1/2 litlu epli, 1 sneið Lindbergbrauð með kjúklingakæfu.
Millibiti: 1 pk. Läkerol cactus.

Samtals var þetta um 1320 kkal. og 70 grömm kolvetni. Mjög fínt bara.

Við eiginmaðurinn fórum í ræktina saman áðan og litlu krakkagrislingarnir komu með og voru í barnapössuninni á meðan. Sú sem var í afgreiðslunni hló bara og sagði að nú væri bara öll familian komin í ræktina ;) Reyndar var Elísa heima, hún nennti sko ekki með og vera í einhverri "smábarnapössun". Svo hún sat bara heima og spilaði SIMS á meðan ;)

En þetta var mjög fínt og Bjöggi var ánægður með þetta. Hann fékk prógramm sett upp fyrir sig og mörg góð ráð, svo nú er bara að fara að æfa ;) Reyndar er hann alveg búinn á því núna, hahaha, karlgreyið hefur ekki hreyft sig í mörg ár og þar að auki svaf hann lítið s.l. nótt. Hann liggur bara hálfsofandi inni í rúmi (var sko að þykjast að lesa, en ég heyri hroturnar ;). Ég stakk upp á því áðan, að hann færi næst í ræktina á laugardaginn og honum leist vel á það. Svo nú erum við svaka heilsusamleg, hehehehe.

Bölvaður kuldi er þetta annars alltaf í mér núna, mér er bara alltaf kalt og alltaf með einhvern hroll. Hef reyndar alltaf verið kuldaskræfa en aldrei eins mikið og núna. Kannski er þetta bara vegna þess að einangrunin er búin að minnka svona mikið :Þ

Og enn gengur bara vel ;)

Já, það er bara allt í góðu hér. Var að vinna í dag og borðaði bara nestið mitt frá því í gær í hádeginu. Tók mér frí frá ræktinni í dag en fer annað kvöld með kallinum ;) Hlakka nú bara helling til. Svona var dagurinn matarlega séð:

Morgunmatur: 2 sneiðar Lindbergbrauð, önnur með kjúklingakæfu og hin með kjúklingasalati, 125 mL léttjógúrt með ananas.
Hádegismatur: 2 Fiber+ hrökkbrauðssneiðar, önnur með létta og léttosti, hin með létta, roastbeef og eggjum, 125 mL léttjógúrt með skógarberjum.
Kvöldmatur: Nautakjötsstrimlar steiktir á pönnu með wok grænmeti, smá sósa úr Crémefine og steikarsoðinu.
Kvöldsnarl: 2 sneiðar Lindbergbrauð, önnur með kjúklingakæfu og hin með kjúklingasalati.
Millibiti: 2 Atkinssúkkulaði, 1 pk. Läkerol salmiak.

Í heildina gerir þetta um það bil 1450 kkal. og 75 grömm kolvetni. Alveg í góðu lagi ;)

Er annars einhver ykkar klár kökukerling? Mig vantar svo góðar leiðbeiningar eða hugmyndir um hvernig er best að draga upp mynd á köku til að gera með smjörkremi. Arna verður fimm ára á mánudaginn og það verður veisla á sunnudaginn. Mig langar svo að gera fína köku með mynd af Þyrnirós (Disney útgáfuna). Er búin að finna góða mynd, vantar bara að vita hvernig er best að koma henni á kökuna svo ;)

Komin heim ;)

Sit hér og gæði mér á skyri með banana, svaka gott. Hér er matseðill dagsins ;)

Morgunmatur: 2 sneiðar Lindbergbrauð með L&L, roastbeef og eggjum, 125 mL léttjógúrt með hindberjum.
Hádegismatur: 2 sneiðar Lindbergbrauð, önnur með kjúklingakæfu, hin með kjúklingasalati.
Miðdegisverður: Soðinn þorskur með smá hollandaissósu, 1 pínulítil kartafla og smá af baunum og gulrótum.
Kvöldsnarl: Skyr með strásætu og Crémefine, 1/2 niðursneiddur banani.
Millibiti: 2 Atkinssúkkulaði, 1 pk Läkerol cactus og 3 konfektmolar.

Þetta gerði u.þ.b. 1250 kkal. og 73 grömm kolvetni. Konfektmolarnir voru alveg meðvituð ákvörðun, var búin að reikna út að ég mætti við þeim ;) Annars borðaði ég ekki nestið sem ég tók með mér þar sem það var afgangur af miðdegisverðinum í vinnunni, og þorskur er hollur og kolvetnasnauður svo ég fékk mér svoleiðis.

Mér finnst ég bara vera komin á mjög gott ról. Maður eiginlega finnur þetta svolítið hvernig maður er stemmdur og hvernig manni mun ganga. Ég er mjög vel stemmd núna og hef fulla trú á að mér gangi vel næstu dagana (og helst vikurnar ;).

Annars held ég að mér sé búið að takast að draga kallinn með mér í ræktina. Hann á allavegana pantaðan prufutíma á fimmtudagskvöldið. Hann þarf nú alls ekki að grennast heldur þarf hann bæta á sig. Held bara að það geri honum mjög gott að fara í smá þjálfun, byggja upp vöðvana og koma sér í gott form. Við erum líka að vona að það hafi jákvæð áhrif á mígrenið hans. Kannski hann ætti að fara að drekka prótíndrykki, ætla að spyrja þjálfarann út í það þegar við förum á fimmtudaginn. Fórum saman og versluðum á hann íþrótaskó... og nýjar íþróttabuxur handa mér, svartar sko. Hinar svörtu buxurnar mínar eru orðnar allt, allt of stórar. Svo nú á ég tvö mjög fín íþróttafötssett ;)

En djöfull púlaði ég í ræktinni í dag. Fór á Orbitrekkið í 45 mínútur og hafði það sko bara ansi erfitt, og gerði svo magaæfingar (4 x 20). Húrra fyrir mér ;D

Og áfram heldur dugnaðurinn ;)

Eða byrjar allavegana vel. Búin að fara í ræktina og púla og er svo að fara að vinna á kvöldvakt núna. Tek með mér eitthvað hollt og gott nesti. Hef lítinn tíma að skrifa núna en kíki á ykkur í kvöld þegar ég kem heim og smelli þá inn matseðlinum líka ;)

Ánægð með daginn ;)

Ég er búin að vera mjög dugleg í dag og er afskaplega ánægð með mig ;) Mataræðið alveg verið til fyrirmyndar og einnig dreif ég mig í ræktina og tók vel á á Orbitrekkinu. Lét það reyndar duga í þetta skiptið þar sem ég var svolítið tímabundin. En ég tók samt 45 mínútur á því. Mp3 græjan mín er bara argasta snilld sko, ég er svona helmingi orkumeiri þegar ég er með mína eigin músík ;) Orba í takt við dúndrandi tónlist og dilla mér næstum því með. Eini gallinn er að ég þarf virkilega að hemja mig að fara ekki að syngja með upphátt, hehe.

En svona var matseðill dagsins:

Morgunmatur: 2 sneiðar Lindbergbrauð, önnur með L&L, léttosti og skinku, hin með léttmarmelaði og léttosti. 125mL léttjógúrt með mangó (svakalega létt allt saman ;)
Hádegismatur: 2 sneiðar Lindbergbrauð með L&L, roastbeef og eggjum.
Miðdegisverður: Þurrsteikt nautahakk með wok grænmeti og low carb pasta, 1 msk chili sósa og 1 msk créme fraiche dressing.
Kvöldsnarl: Skyr með strásætu og Crémefine, 1/2 banani.
Millibiti: 1 pk. Läkerol salvi.

Samtals gerir þetta um 1260 kkal. og 70 grömm kolvetni. Er sko alveg sátt við það ;)

Svo verður önnur afmælisveisla á sunnudaginn, yngri skvísan mín verður nefninlega fimm ára á mánudaginn eftir viku. En í þetta skiptið ætla ég að passa að baka low carb möffinsana handa mér ;) Enda hef ég betri tíma núna að undirbúa veisluna. Ætla sko ekki að bæta á mig jólakílóunum eina ferðina enn ;)

Jæja skvísur, er farin bloggrúntinn ;)

Smá pælingar

Þarf held ég að setja mér eitthvað tímamarkmið. Þar sem 72 kíló var langtímamarkmiðið mitt ætla ég bara að halda mig við það og byrja á að ná því. Ég er sem sagt rétt um 75 kg núna sem merkir að það eru 3 kg í þetta markmið mitt. Í raun ætti ég alveg að geta náð því á 3 vikum, en höfum þetta aðeins léttara og segjum einn mánuð. Þannig að 16 febrúar ætla ég að vera orðin 72 kg. Það þýðir að ég þarf að missa um 600-700 grömm á viku. Það ætti nú alveg að vera gerlegt ;)

Matarskýrslan

Svona var þá dagurinn matarlega séð:

Morgunmatur: 2 sneiðar Lindbergbrauð, önnur með L&L og roastbeef, hin með léttmarmelaði og léttosti. 125 mL léttjógúrt með skógarberjum.
Hádegismatur: 1 sneið kalt hangikjöt.
Miðdegisverður: Ferskt salat með skinku og osti, smá dressing.
Kvöldsnarl: 2 sneiðar Lindbergbrauð, önnur með L&L, skinku og léttosti, hin með léttmarmelaði og léttosti. 125mL léttjógúrt með ananas.
Millibiti: 1 pk. Läkerol, 2 Atkinssúkkulaðistykki (30 gr hvort), 1 banani.

Samtals var þetta um 1325 kkal. og 75 grömm kolvetni. Töluvert mikið skárra en það sem ég hef verið að láta í mig undanfarna daga ;) Fór reyndar ekki í ræktina í dag, en geri það á morgun.

Þetta gengur ekki lengur

Nei stelpur, þetta gengur ekki lengur að vera í stanslausu sukki. Stalst í restirnar af afmæliskökunni í gærkvöldi. Nú bara verður tekið á þessu almennilega. Vigtin var ekkert sérstaklega góð við mig í morgun, sýndi 75,1 kg, en það er bara svipað og ég var síðast. Hundfúlt eiginlega því ég var búin að sjá töluvert lægri tölu í vikunni. En það er nú ekki við öðru að búast þegar maður lifir á pizzu, kökum og sælgæti. Nú verður sko bara hollusta í dag. Kem með matarskýrsluna í kvöld.

Best að kíkja á ykkur skvísur ;)

Svindl dag eftir dag

Já sorry Bryndís, en það var ógurlegt svindl í dag líka. Ég hafði engan tíma að útbúa neitt spes fyrir mig í afmælispartýinu svo ég datt bara í kökur og pizzu og sælgæti. Ekki léttist ég mikið þessa vikuna, er örugglega orðin þyngri :S Það er búið að vera svo mikið að gera hjá mér í kringum þetta, vinna og reyna að undirbúa afmæli. Ég var svo úrvinda eftir þetta allt saman í gær að ég steinrotaðist í hægindastólnum klukkan 22:30, skreið svo upp í rúm klukkan 5:30 og hélt áfram að sofa og svaf til klukkan 14. Ég hefði örugglega getað sofið lengur. En svakalega var nú samt gott að fá að sofa svona.

En jæja, dagurinn í dag lítur betur út. Byrjaði hann á Lindbergbrauði og léttjógúrt og svo ætla ég að drífa mig í ræktina eftir smá stund ;)

Humm :S

Ekkert sérstaklega góður dagur í dag. Bara mikið að gera og ég planaði ekkert matseðilinn. Búin að vera að stússast á fullu fyrripart dags og svo kvöldvakt í vinnunni. Borðaði svo sem enga óhollustu, bara of mikið af öllu. Hef heldur ekkert skrifað niður mataræðið, veit bara að það var of mikið. Á morgun er annar eins dagur, er á morgunvakt og hef svo tvo tíma til að undirbúa afmæli. Ætla að gera pizzu og hugsa að ég skelli svo bara í skúffuköku, langeinfaldast. Hef ekki einu sinni haft tíma til að fara í ræktina, en á laugardaginn get ég druslast þangað aftur. Jájá, reyni samt að vera dugleg á morgun ;)

Gaddem!!!

Hvað haldiði að ég hafi fundið hér uppi í skáp? Jú, After Eight súkkulaðiöskju sem átti að étast um jólin en GLEYMDIST!!! Svo ég þurfti endilega að asnast til að freistast í það núna og er sko með samviskubit dauðans. Er búin að troða því langt upp í skáp aftur. Að öðru leyti var dagurinn fínn nema ég fór ekki í leikfimi. Er bara búin að vera á fullu að taka til fyrir afmælispartýið á fösudaginn. Er nefninlega á kvöldvakt á morgun og morgunvakt á föstudaginn, svo ég hef eiginlega ósköp lítinn tíma að græja þetta allt saman. En matseðill dagsins var svona:

Morgunmatur: 2 sneiðar Lindbergbrauð með L&L, roastbeef og eggjum, 125 mL léttjógúrt með mangó.
Hádegismatur: 1 sneið sólkjarnabrauð (skipt í tvennt) með kjúklingasalati/lifrarkæfu, 1 köld hangikjötssneið.
Miðdegisverður: Kjúklinga og sveppasúpa, 1 sneið Lindbergbrauð með léttmarmelaði og léttosti.
Kvöldsnarl: Skyr með strásætu og Crémefine, 1 lítill banani.
Millibiti: Low carb lakkrís, 12 After Eight súkkulaði (jebb 12 stykki :S)

Ótrúlegt en satt þá gerði þetta þó ekki meira en um 1640 kkal., en kolvetnagrömmin urðu líka alveg nánast 160 :S

Ég er á fullu að reyna að sortera dótið sem litlu krílin mín eiga. Ég bara tók það allt fram... hræðilega eiga þau mikið af dóti :S Ég ætla sko að láta meirihlutann af þessu hverfa bara, það er ekkert pláss fyrir þetta og allt fer bara í drasl strax. Og þegar það er ekkert nema drasl þá sjá þau hvort sem er ekki dótið, þá sjá þau bara drasl og það er ekkert spennandi að leika sér með drasl. Best að halda áfram smá. Kíki samt bloggrúnt fyrst ;)

Skrýtinn dagur

Ég sofnaði sko ekki dúr síðustu nótt, enn alveg föst á næturvaktatíma. Svo klukkan sjö gafst ég bara upp, vakti krakkana og kom þeim í leikskóla og skóla, og dreif mig svo bara í ræktina. Svo kom ég heim, fékk mér smá að borða og lagði mig eftir það í 3 tíma. Þá sótti ég krakkana í leikskólann og dormaði síðan smá í sófanum á meðan þau horfðu á barnatíma. Svo rotaðist ég bara í sófanum í kvöld og vaknaði um miðnætti. Algjört rugl ;)

En svona var dagurinn matarlega séð:

Morgunmatur: Enginn.
Hádegismatur: 2 sneiðar Lindbergbrauð, önnur með kjúklingasalati, hin með L&L, roastbeef og eggjum, 125 mL léttjógúrt með jarðarberjum.
Miðdegisverður: Skyr með gervirjóma (Crémefine) og strásætu, köld hangikjötssneið.
Kvöldsnarl 1: Ferskt salat með rækjum, fetaosti, ólívum og ristuðum furuhnetum, smá dressing.
Kvöldsnarl 2: 1 stór sneið sólkjarnabrauð með kjúklingasalati/léttsultu og osti/lifrarkæfu (skipti henni í 3 litlar sneiðar).
Millibiti: 75 gr vínber og hálft epli, 1 pk. Läkerol salvi.

Samtals er þetta um 1330 kkal. og 75 grömm kolvetni. Bara allt í lagi. Ég er ógeðslega ánægð með að hafa bara drifið mig í ræktina í morgun, hefði annars varla nennt því um kvöldið, var svo þreytt og asnaleg þá. Ætla líka að reyna að fara á morgun.

En stelpur, eruð þið með msn? Gæti kannski verið gaman að spjalla þar stundum. Mitt msn mail er lilja@vortex.is ef þið viljið adda mér. Endilega smellið ykkar inn ef þið viljið.

Jæja, best að fara bloggrúntinn.

Törnin búin

Jæja, ágætt að vera búin á næturvöktunum. Ég ákvað reyndar að fara ekki í ræktina í kvöld, ákvað bara að eyða tímanum eftir að ég var búin að sofa með krökkunum mínum. Undanfarin 4 kvöld hefur það verið Bjöggi sem hefur komið þeim í bólið þar sem ég hef þurft að fara á næturvaktir, svo mér fannst bara réttara að sleppa því að fara í ræktina í þetta sinn og vera smá mamma ;) Var líka að gera afmælisboðskort fyrir Elísu, en hún verður 10 ára á föstudaginn og ætlar að hafa stelpupartý ;)

Ég er ekki búin að klára að skrifa niður matarlistann í dag og þar með ekki reikna út kaloríur eða kolvetni, set það inn seinna ;)

Súkkulaði og konfekt, sælgæti og kökur

Hmm, ég hefði átt að monta mig aðeins minna í gær hvað þetta gengi vel. Þegar ég mætti á næturvaktina í gærkvöldi þá hreinlega flóði allt í konfekti og súkkulaði. Og ekki nóg með það heldur biðu líka eftir okkur afgangar af pizzu. Þetta var bara hræðilegt. Ég var því miður of veik á svellinu og fékk mér slatta af súkkulaðirúsínum og svona Ferrero Rocher súkkulaðimolum, hræðilega góðir. En stóðst samt pizzuna og neitaði að opna hinn konfektkassann sem stóð á borðinu. Hann var nefninlega alveg óopnaður og sem betur fer voru hinar stelpurnar bara sammála mér að láta hann alveg eiga sig. Liðið sem var á dagvakt og kvöldvakt í dag hefur vonandi bara klárað kassann í dag.

Já og svo ætlaði ég í ræktina en hún er bara opin frá 12-18 á sunnudögum. Nema að ég gleymdi að það var jólatrésskemmtun á vegum foreldrafélagsins í leikskólanum. Mundi eftir því nógu snemma og dreif krakkana á ballið, en komst náttúrulega ekkert í ræktina fyrir vikið. Var of sein að finna með mér nesti svo auðvitað freistaðist ég í kökurnar sem voru á boðstólnum þarna, oh! Jæja, það þýðir víst lítið að gráta Björn bónda.

En sem sagt, síðasti sólarhringur hefur verið agalegur sukk-sólarhringur. Vigtin sýndi mér samt 75,2 kg þegar ég vaknaði og ég er bara ánægð með það. Verður bara enn betri eftir viku ;)

Síðasta næturvaktin í bili í nótt, vonandi verða engar freistingar núna... og ef þær verða þá ætla ég bara algjörlega að sneiða fram hjá þeim.

Allt í gúddí ;)

Vigtin er farin að mjakast niður aftur, er afskaplega fegin. Ég var að spá í hvort ég ætti að hafa einhverja aðra daga en sunnudaga sem vigtunardaga, og hugsunin á bak við það var nú hreinlega að maður er kannski stundum aðeins þyngri á sunnudögum eftir helgina en fyrir hana. En ég komst svo að þeirri niðurstöðu að það skiptir engu máli hvenær ég vigta mig. Ég er hvort sem er bara að skoða vikulegan mun og einhver 100-300 gramma munur frá föstudegi til sunnudags ætti ekki að skipta neinu. Svo ég held mig bara við sunnudagana.

Ég er búin að vera svo dugleg í ræktinni þessa vikuna, fór mánudag, miðvikudag, fimmtudag og föstudag. Þannig að ég ætla bara að eiga frí í dag og fara á morgun ;) Mataræðið gengur líka vel, ég er mjög ánægð því næturvaktirnar setja stundum hlutina smá úr skorðum hjá mér þar sem mig vantar regluna á máltíðarnar. þá fer ég stundum aðeins yfir strikiðm, þ.e. borða of mikið. En mér sýnist þetta vera í góðu lagi núna. Set sant ekki inn neinn matseðil núna. En síðasta sólarhring innbyrti ég um 1380 kkal og 55 grömm kolvetni.

Æ litli snúllinn minn er dottinn út af í sófanum, híhí. Hann átti nú ekkert að sofna núna, en ég tími ekki að vekja hann ;) Leyfi honum að leggja sig smá.

Best að kíkja á ykkur stelpur ;)

Stutt skýrsla í dag

Hef svo lítinn tíma dúllur, kemst ekki bloggrúnt í kvöld en reyni að kíkja á ykkur á morgun. Ætla að leggja mig smá fyrir næturvaktina nefninlega ;)

Annars gengur bara vel, mataræðið alveg ok miðið við næturvaktir, hehe. Eiginlega bara nokkuð gott. Fór líka í ræktina í dag, í pallatíma, og var sko kófsveitt þegar ég kom út úr tímanum ;)

Luvja görlís :D

Næturvaktir framundan

Jámm, er að fara á næturvakt í nótt, þá fyrstu af fjórum í þessari lotu. Mataræðið verður alltaf svolítið skrýtið þegar ég er á næturvöktunum, enda furðulegir matmálstímar. Hef ekki tíma til að skrifa inn matseðilinn núna, en hingað til eru hitaeiningarnar orðnar um 1290 og kolvetnagrömmin 43. En ég veit alveg að ég á eftir að borða eitthvað í nótt, meika sko ekki heila næturvakt án þess að borða neitt ;) Svona er þetta bara og mun vera.

En ég fór í ræktina í dag og tók vel á. Keypti mér meira að segja ný leikfimiföt, í stærð M, algjör gella hehe. Þau sitja alveg þétt á mér, en þannig vil ég líka hafa það, þá sé ég betur breytingarnar á líkamanum ;) Þetta mp3 tæki er áfram hin mesta snilld sem ég hef komist í, allavegana í sambandi við úthald og skemmtun við að orbitrekka ;D (verð örugglega farin að syngja með upphátt einhverntíman).

Sé ykkur á morgun dúllurnar mínar, verð að drífa mig í vinnuna ;)

Hey beibs ;)

Ég er hér. Var á kvöldvakt í gær og var bara eitthvað svo þreytt og andlaus þegar ég kom heim að ég nennti ekki að blogga. Gærdagurinn var samt alveg fínn matarlega séð. Hins vegar freistaðist ég aðeins í einhverjar afgangs piparkökur og eitthvað gúmolaði hér í dag. Nenni samt ekki að svekkja mig of mikið á því. Fór í ræktina og púlaði vel og ég finn að vökvinn er að renna af mér. Þegar ég kom heim frá íslandi hefur vigtin eflaust verið í kringum 78 kg, en í morgun t.d. var hún 76, svo þá er "bara" 3 kg að ég komist aftur í það sem ég var fyrir jól. En þó að ég sé ekki alveg smollin í svaka duglega gírinn minn þá er ég samt langt frá því að vera í sukkinu sem ég var í. Svo er líka rosalega gott að vera byrjuð aftur í ræktinni. Ég finn að þetta er sko allt að koma hjá mér og er bara ánægð með mig þrátt fyrir þetta gúmolaði sem ég stalst í í dag. Reiknast til að kaloríurnar haldist samt vel undir 2000 og þó kolvetnamagnið sé aðeins í hærri kantinum fer það ekki yfir 85 grömm.

Jæja snúllur, kíkið svo endilega hér til hægri og skoðið nýjustu átaksbloggin. Maður verður nú að peppa þessar stelpur upp... og auðvitað okkur allar hinar :D

Matseðill dagsins

Bara smella honum inn ;)

Morgunmatur/hádegismatur: 2 sneiðar Lindbergbrauð með L&L, roastbeef og eggjum, 125 mL léttjógúrt með jarðarberjum.
Miðdegisverður: Soðin ýsa með léttsteiktu grænmeti og smá Créme fraiche dressing.
Kvöldsnarl: 2 sneiðar Lindbergbrauð með L&L, roastbeef og eggjum, 125 mL léttjógúrt með apríkósum.
Millibiti: ca 35 gr harðfiskur, 2 low carb karamellur með súkkulaðihúð og nokkrar low carb jellybeans.

Samtals gerir þetta um 1430 kkal. og 60 grömm kolvetni. Er reyndar að hugsa um að bæta við smá harðfisk og narta í hann yfir góðri mynd núna.

Annars var frábært að fara í ræktina með mp3 spilarann, hreinlega ótrúlegur munur. Ég hafði miklu meira úthald og tíminn leið miklu hraðar af því að það var svo gott að ahfa tónlist sem passaði alveg við hraðataktinn sem maður vildi halda, og var skemmtileg ;)

Ný byrjun

Já, það veitir sko ekki af. Ég held hreinlega að ég hafi fengið á mig 5 kg, enn og aftur. Reyndar vigtaði ég mig ekki í morgun, enda svo sem sólarhringurinn svolítið úr skorðum og ég ætla ekki að setja inn tölu fyrr en það er komið smá jafnvægi á. En það verður bara að hafa það og ég er byrjuð aftur í mínu venjulega mataræði og er bara alveg ROSALEGA fegin. Nú verður sko ekkert meira Machintosh eða Nóa konfekt og Sambó lakkrís. Ég reyndar keypti slatta af low carb sælgæti á Íslandi og ætla að eiga það þegar nammiþörfin er að fara með mig. Svo á ég harðfisk líka. Keypti meira að segja líka skyr og frosna ýsu á Íslandi sem ég tók svo með mér hingað ;)

En já, það er gott að vera byrjuð aftur. Elsku kallinn minn gaf mér mp3 spilara í jólagjöf og ég hlakka svakalega til að fara með hann í ræktina á eftir og geta Orbitrekkað í takt við MÍNA tónlist ;) Ætla að drífa mig á eftir. Ég tók nú leikfimifötin með mér til Íslands og ætlaði að drífa mig einhverja dagana, en það gafst bara enginn tími til þess. Komst ekki einu sinni í sund :S En það verður gott að komast í hreyfinguna aftur.

Jæja, ég ætla að fá mér Lindbergbrauð með eggjum og roastbeef, og eina jógúrtdós ;) Skrifa svo matseðil dagsins inn seinna í dag. Ætla að kíkja bloggrúnt á ykkur stelpur ;)

Komin heim

Þá er maður kominn heim, spikfeitur eftir hátíðarnar og veislurnar. Þori ekki á vigtina strax, heh. Jájá. Á morgun byrjar nýja átakið ;)